Аварыя з верталётам прэзідэнта Ірана здарылася ў далікатны момант для міжнародных адносін
Крушэнне верталёта, на борце якога знаходзіўся прэзідэнт Ірана Ібрахім Раісі, адбылося ў няпросты момант для міжнародных адносін, усяго праз некалькі дзён пасля таго, як высокапастаўленыя амерыканскія і іранскія афіцыйныя асобы правялі перамовы праз пасярэднікаў, каб паспрабаваць знізіць пагрозу больш шырокага канфлікту на Блізкім Усходзе, піша The New Your Times.
На працягу многіх гадоў Іран і Ізраіль былі ўцягнутыя ў ценявую вайну, якая суправаджалася нападамі на сушы, моры, у паветры і ў кіберпрасторы — многія з іх былі таемнымі або ажыццяўляліся даверанымі асобамі па ўсім Блізкім Усходзе. Але рызыкі больш шырокага канфлікту рэзка ўзраслі з тых часоў, як ХАМАС напаў на Ізраіль 7 кастрычніка 2023 года, што прывяло да вайны ў Газе і каскаду ўдараў і контрудараў па ўсім рэгіёне.
Ваенныя дзеянні пачаліся пасля таго, як у красавіку Ізраіль нанёс авіяўдары па будынку комплексу іранскага пасольства ў Сірыі. Іран нанёс зваротны ўдар, здзейсніўшы сваю першую прамую атаку на Ізраіль пасля дзесяцігоддзяў варожасці, запусціўшы ў бок Ізраіля больш за 300 беспілотнікаў і ракет, многія з якіх былі збітыя.
Іран, здавалася, меў намер даказаць, што ён будзе атакаваць наўпрост, а не проста спадзявацца на сваіх давераных асоб, такіх як «Хезбола» ў Ліване, хусіты ў Емене або апалчэнцы ў Іраку. Аднак, на думку аналітыкаў, іранскі абстрэл таксама быў разлічаны на тое, каб нанесці невялікую шкоду, што адлюстроўвае зацікаўленасць у прадухіленні вайны.
Тым не менш, існуе верагоднасць больш шырокага канфлікту, і ў апошнія дні амерыканскія і іранскія афіцыйныя асобы прынялі ўдзел у непрамых перамовах у Амане — першых падобных перамовах пасля нападу ў адказ Ірана на Ізраіль у мінулым месяцы.
Джэйк Саліван, дарадца Белага дома па нацыянальнай бяспецы, заявіў на прэс-канферэнцыі на мінулым тыдні, што «пагроза, якую Іран і яго стаўленікі ўяляюць Ізраілю, рэгіянальнай стабільнасці і амерыканскім інтарэсам, відавочная».
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца1515
Каментары
Хаця вядома, што Раісі вперде.
З.ы. Пазбаў і нас ад лукавага, ну плііііз!