Журналіст RT паказаў, як расійскія войскі выкарыстоўваюць хімічную зброю ва Украіне
Крэмль увесь час адмаўляе ўжыванне хімзброі ва Украіне.
Журналіст дзяржаўнага расійскага інфармагенцтва RT Андрэй Філатаў паказаў, як расійскія войскі «выкурвалі» ўкраінскага кулямётчыка з пазіцыі ў раёне Аўдзееўкі. Філатаў прызнаўся ў выкарыстанні ВС РФ хімічнай зброі — газавых гранат, звярнула ўвагу ASTRA. Відэа апублікаваў афіцыйны тэлеграм-канал RT.
«Тут відаць процівагаз, які вісеў у кулямётчыка. Цынкі з-пад патронаў. Тут вось газавая граната, якую скінулі мы», — кажа Філатаў у сваім рэпартажы.
Філатаў паказаў, як мяркуецца, расійскую газавую гранату РГ-РА (ручная граната — рэчыва атрутнае). Па дадзеных УСУ, у РГ-РА змяшчаецца атрутны газ хлорацэтафенон. Гэты газ знаходзіцца ў 1 спісе Канвенцыі аб хімічнай зброі. Сімптомы атручвання хлорацетафеноном — гэта ваніты і слёзавыдзяленне, а таксама раздражненне скуры.
Са слоў Філатава, украінская пазіцыя была ўзятая расійскімі войскамі 1 снежня 2023 года. У пасце RT адзначаецца, што «раней публікаваць гэтыя кадры было нельга з меркаванняў бяспекі». Упершыню аб выкарыстанні гранат РГ-РА расійскай арміяй УСУ паведамілі ў тым жа месяцы.
Пра ўжыванне гранаты РГ-РА расійскім бокам таксама распавядаў блогер Уладзімір Раманаў.
«Знаёмцеся, гэта РГ-РА. Вельмі эфектыўная газавая граната. Шляхам скіду з коптара яна дапамагае хутка выкурваць праціўніка з хованкі», — напісаў ён у тэлеграм-канале ў канцы 2023 года.
У пачатку траўня дзяржаўны дэпартамент ЗША абвінаваціў Расію ў выкарыстанні газу хлорпікрын супраць украінскіх войскаў у парушэнне Канвенцыі аб забароне хімічнай зброі.
Прэс-сакратар прэзідэнта РФ Дзмітрый Пяскоў тады адказаў, што «як заўсёды, такія абвінавачванні гучаць абсалютна галаслоўна і нічым не падмацаваныя».
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары