Кіроўца Следчага камітэта даносіў на пратэстоўцаў у 2020-м. А яшчэ займаўся махлярствам і зліваў паліва
Нягледзячы на вялізарную шкоду, «самы гуманны беларускі суд» вырашыў не адпраўляць Аляксандра Прасняка ў калонію. У СІЗА ён таксама не быў.
Аляксандру Прасняку 36 гадоў. Родам ён з аграгарадка Бацэвічы Клічаўскага раёна.
Незразумела, дзе ён вучыўся, але вядомыя два месцы працы Прасняка: кіроўца ў Следчым камітэце (як мінімум у 2020-2022), а з 2023-га — кіроўца ў «Белаўтатурысце». Апошняя кампанія займаецца арганізацыяй тураў, трымае сетку гасцініцаў і турбазаў.
Адзначыўся Прасняк у 2020-м. Тады ён пазваніў у міліцыю і данёс, што 15 лістапада, у дзень памяці забітага Рамана Бандарэнкі, пажылы мужчына з унукам стаялі на мосце праз МКАД і віталі машыны, якія ехалі і сігналілі.
А нядаўна яго асудзілі.
Рэч у тым, што пад час працы кіроўцам у СК Прасняк напазычаў грошаў у сябра Т. пад рознымі нагодамі — аплаты жытла, унясення платы па іпатэцы, куплі дэталяў і дапамогі з набыццём спісанай тэхнікі Следчага камітэта. Агулам — $12 300. Ён жа напазычаў у розных людзей яшчэ пару тысяч даляраў.
Пасля, калі працаваў у «Белаўтатурысце», ён зліваў паліва, якое прадаваў сваім знаёмым. Агулам зліў 300 літраў на 708 рублёў.
Сам Прасняк патлумачыў, што падчас працы ў СК ён пазнаёміўся з Т., які прапанаваў яму адкрыць СТА. Ён пазычыў $4250 і ўклаўся, але хуткага прыбытку не атрымалася. Прасняк, маўляў, аказаўся ў цяжкім становішчы — на ім павіслі даўгі, двое дзяцей, жонка, арэнда і рамонт у хаце.
Пасля ён пазычаў у Т. грошы. Пасля таго, як ён надакучыў Т., то каб атрымаць грошы, прыдумаў байку пра тое, што можа дапамагчы купіць спісаныя аўтамабілі СК. І ўзяў на гэта яшчэ $3800.
Далей ён не прыдумаў нічога лепшага, чым пачаць пазычаць ва ўсіх запар — знаёмых, суседзяў і калегаў… Але доўг не было чым гасіць, таму Прасняк нікому нічога не вяртаў. Для саліднасці ўсім казаў, што нечуваныя багацці пад працэнтам у банку, але як толькі падыдзе тэрмін, то ён адразу аддасць грошы. А паралельна браў яшчэ і «хуткія крэдыты».
У выніку некалькі чалавек звярнуліся ў міліцыю, і ў адносінах Прасняка завялі справу. Пад час расследавання ўскрылася яшчэ і тое, што ён зліваў паліва.
Да суда былы кіроўца СК быў пад падпіскай аб нявыездзе, хоць і здзейсніў цяжкае злачынства.
Яго абвінавацілі па трох артыкулах — «прысабечванне або растрата» (ч. 2 арт. 211 КК) і «махлярства» (ч. 2 і 3 арт. 209 КК). Прасняку пагражала да сямі гадоў калоніі і штраф.
На судзе да яму выставілі пазоваў на $14 200. Таксама ў Прасняка запатрабавалі маральныя кампенсацыі — прычым не тыя, хто найбольш пацярпеў, а ягоныя былыя калегі. Адзін з іх, Б., папрасіў 20 тысяч рублёў, хоць пазычыў Прасняку ўсяго 400 рублёў.
У якасці змягчальных абставінаў у судзе прагучала тое, што ў Прасняка двое дзяцей, што ён пакаяўся, а таксама што аддаў 700 рублёў «Белаўтатурысту». У якасці абцяржарваючай акалічнасці — тое, што ён парушыў прысягу.
У выніку Прасняк атрымаў 5 гадоў хіміі з пазбаўленнем звання «старшы прапаршчык юстыцыі запаса». Таксама ён павінен вярнуць пазычанае. Кампенсацыя маральнай шкоды былым калегам склала сумарна 1000 рублёў. Б., які прасіў 20 тысячаў, атрымае толькі 100 рублёў.
Пасля суда Прасняка пакінулі з забаронай на выезд з Беларусі.
«Наша Нiва» — бастыён беларушчыны
ПАДТРЫМАЦЬ
Каментары