У трайным скачку на Алімпіядзе п'едэстал занялі кубінцы — і ніводзін з іх не прадстаўляе Кубу. Усе яны ўцяклі з краіны
Ураджэнцы «Вострава свабоды» ў розны час уцяклі з яго зборнай і цяпер прынеслі ўзнагароды еўрапейскім краінам.
Цікавая сітуацыя склалася ў спаборніцтвах па мужчынскім трайным скачку на Алімпіядзе-2024 у Парыжы. Увесь п'едэстал занялі выхадцы з Кубы, але ніводзін з іх за родную краіну не выступае.
Алімпійскім чэмпіёнам стаў Хардан Дыяс Фартун, які прадстаўляе Іспанію. 23-гадовы ўраджэнец Гаваны ў складзе зборнай Кубы браў золата на юніёрскім і маладзёжным чэмпіянатах свету. А ў 2021-м годзе падчас збораў у Іспаніі ён збег з каманды і папрасіў іспанскае грамадзянства па каранях.
Да выступленняў за зборную Іспаніі яго дапусцілі толькі ў 2024 годзе. І атрымалася ўсё звышпаспяхова: ён выйграў золата чэмпіянату Еўропы, а цяпер стаў першым і на Алімпійскіх гульнях — з вынікам 17.86 метра.
Срэбраны медаль Алімпіяды заваяваў прадстаўнік Партугаліі Пабла Пічарда — чэмпіён мінулых Гульняў у Токіа. Ён нарадзіўся ў Санцьяга-дэ-Куба, выступаў за родную краіну да 2017 года. А потым збег з каманды на зборах у Штутгарце, з'ехаў у Партугалію і атрымаў грамадзянства.
У складзе новай каманды ён стаў алімпійскім чэмпіёнам, чэмпіёнам свету і Еўропы, а цяпер узяў срэбра Гульняў. Былому суайчынніку ён саступіў толькі два сантыметры.
На трэцюю прыступку п'едэстала ў Парыжы падняўся яшчэ адзін гаванец Эндзі Дыяс. Ён пакінуў зборную Кубы ў 2021 годзе, калі проста перад Алімпіядай у Токіа атрымаў траўму.
На радзіму вяртацца ён адмовіўся, замест гэтага Дыяс адправіўся ў Італію, дзе ў 2023 годзе атрымаў грамадзянства. Алімпійская бронза з вынікам 17,64 — першы вялікі поспех 28-гадовага скакуна.
Яшчэ адзін кубінец у фінале Алімпіяды прадстаўляў усё ж родную краіну — срэбраны прызёр чэмпіянату свету-2023 Лазара Марцінэс на Гульнях у Парыжы стаў толькі восьмым (17,34).
Уцёкі перспектыўных спартсменаў з Кубы ў ЗША і краіны Еўропы ў пошуках лепшых умоў для падрыхтоўкі і больш высокага ўзроўню жыцця — гісторыя вельмі распаўсюджаная. Камуністычныя ўлады Кубы робяць стаўку на развіццё аматарскага і масавага спорту. Прафесіяналы зарабляюць мала — каля 200 даляраў. Да таго ж, дзяржава забірае ў іх частку прызавых, заробленых на міжнародных стартах.
Да апошняга часу кубінскія законы наогул забаранялі спартсменам з'язджаць выступаць за замежныя прафесійныя клубы. Забарону знялі толькі ў 2013 годзе, але вельмі ўмоўна — пераезд трэба ўзгадняць з чыноўнікамі, працэс можа заняць працяглы час. А тых, хто з'ехаў без дазволу, караюць: кубінскія федэрацыі па відах спорту дамагаюцца дыскваліфікацыі такіх атлетаў.
За апошнія 25 гадоў з Кубы збеглі 50 футбалістаў, больш за 100 бейсбалістаў і вялікая колькасць атлетаў іншых відаў. Многія атлеты «знікаюць» на замежных зборах, ёсць і тыя, хто на свой страх і рызыку плывуць на лодках у ЗША.
Адзін з лідараў зборнай Кубы па валейболе Вільфрэда Леон быў дыскваліфікаваны за жаданне выступаць у Еўропе. Пасля гэтага ён атрымаў грамадзянства Польшчы, з якой дабраўся да фіналу Алімпіяды ў Парыжы. Заўтра ён разам з камандай пазмагаецца за алімпійскае золата.
У 2022 годзе ў ЗША збегла вядомая кідальніца дыска Яйме Перэс — бронзавы прызёр Гульняў у Токіа. У тым жа годзе збег алімпійскі чэмпіён — 2016 па грэка-рымскай барацьбе Ісмаэль Барэра. І гэта толькі некалькі гучных выпадкаў з многіх.
Каментары