«Правакацыя перад прэзідэнцкімі выбарамі». Па даносе Бондаравай у Мінску адмянілі канцэрт расійскага рок-гурта
Уся справа ў песні, якую забаранілі яшчэ ў 2010 годзе.
У Мінску адмянілі канцэрт папулярнага ў 2000-я гады расійскага рок-гурта «Псіхея».
Калектыў павінен быў выступіць у клубе «Рэактар» 21 верасня з нагоды свайго дня нараджэння і 20-годдзя паспяховага альбома «Псіхея».
Аднак на днях афіша канцэрта знікла з сацсетак клуба. 13 жніўня «Псіхея» абвясціла аб адмене канцэрта — «па незалежных ад гурта прычынах».
Прычыны сапраўды ад калектыву не залежалі — уся справа ў тым, што канцэртам зацікавілася Вольга Бондарава. 10 жніўня ў сваім тэлеграм-канале яна заявіла, што Брэсцкая філармонія — арганізатар канцэрта — «вязе ў Мінск экстрэмістаў».
Бондарову абурыла песня «Забі мянта», якая выйшла якраз у альбоме 2004 года. Яна заявіла, што «Псіхея» збіраецца выступаць з гэтай песняй на канцэрце ў Мінску і запатрабавала, каб ГУБАЗіК праверыў арганізатараў, гэта значыць Брэсцкую філармонію, на экстрэмізм. Прычым Бондарава ўмудрылася звязаць рок-канцэрт з выбарамі, якія павінны прайсці ў 2025 годзе.
«Перад выбарамі клікаць у краіну экстрэмістаў — гэта трэба быць ну вельмі неверагодным. Цікава, ГУБАЗіК нам раскажа, хто ж гэта такі ў Брэсцкай аблфілармоніі? А ў клубе «Рэактар»?» — напісала Бондарава. І апублікавала ўрывак з песні, прызнанай у Расіі экстрэмісцкай.
З-за песні «Забі мянта» ў гурта сапраўды былі праблемы ў другой палове 2000-х. У 2010-м суд у Расіі ўнёс кампазіцыю ў спіс экстрэмісцкіх матэрыялаў. З таго часу «Псіхея» больш ні разу не выконвала гэтую песню на канцэртах — у сэт-лісце яе замянілі на трэк «Колькі ж каштуе твая свабода?» з тым жа мінусам, але ўжо без зместу, прызнанага экстрэмісцкім.
Увогуле, «Забі мянта» на канцэрце ў Мінску наўрад ці б прагучала. Але Бондарава, мяркуючы па ўсім, пайшла да канца. Ужо праз два дні пасля яе паста ў тэлеграме продаж білетаў на канцэрт «Псіхеі» быў спынены. 13 жніўня стала вядома аб адмене канцэрта.
Сёння ж Бондарава паскардзілася, што незадаволеныя фанаты гурта здзейснілі налёт на яе тэлеграм-канал. Яны, паводле яе слоў, «пачалі абражаць адміністратараў канала, грамадзян Беларусі і Беларусь». Даносчыца скрыншоты паведамленняў публікаваць не стала, але намякнула, што Id каментатараў адсачылі сілавікі. І зноў звязала «атаку» на свой канал з выбарамі.
«Спробы каго б там ні было напярэдадні прэзідэнцкіх выбараў зацягнуць у краіну тых, хто стварае і распаўсюджвае інфармацыйныя матэрыялы экстрэмісцкага зместу, сее нянавісць да супрацоўнікаў праваахоўных органаў або распальвае іншую варожасць, будуць жорстка спыняцца», — заявіла Бондарава.
«Псіхея» ў нулявыя лічылася адным з галоўных альтэрнатыўных рок-гуртоў Расіі. Калектыў з Кургана збіраў поўныя залы, актыўна гастраляваў, выступаў на разагрэве ў папулярных еўрапейскіх і амерыканскіх гуртоў. У асяроддзі рускамоўных прыхільнікаў альтэрнатыўнага року «Псіхея» атрымала тады практычна культавы статус.
«Калі мне прыляціць, я гатовая». Наста Рагатко — пра сэкс-сцэну ў сваёй кнізе, прарасійскіх сваякоў, Гаюн і Матольку32
Каментары