Рада Еўропы заклікала спрасціць візавы рэжым для беларусаў і не патрабаваць апастылі на дакументах
Парламенцкая асамблея Рады Еўропы апублікавала гайд для вырашэння праблем беларусаў у выгнанні.
ПАРЕ апублікавала рэкамендацыі для еўрапейскіх парламентарыяў з заклікам прыняць меры па спрашчэнні жыцця беларусаў у выгнанні.
Дакумент на 107 старонак «Люксембургскія рашэнні: вынікі і пэрспектывы» апублікаваны на беларускай, англійскай і французскай мовах.
ПАРЕ вылучыла шэраг прапаноў па праблемах, якія найбольш хвалююць беларусаў, якія пакінулі краіну. Так, ПАРЕ рэкамендуе пашырыць выдачу гуманітарных віз сваякам палітвязняў, выдаваць шматразовыя шэнгенскія візы родным беларусаў, якія з'ехалі, а таксама выдаваць шматразовыя візы тым беларусам, якія знаходзяцца пад пагрозай пераследу, але застаюцца на радзіме. Крытэрыі для вызначэння людзей, якім патрэбна такая віза, павінен распрацаваць Аб'яднаны пераходны кабінет.
ПАРЕ заклікае краіны Еўропы забяспечыць беларусам у выгнанні доўгатэрміновую легалізацыю, а таксама выдаваць беларусам пашпарты замежнікаў для забеспячэння іх права на свабоднае перамяшчэнні па Еўрасаюзе. Ёсць прапанова разгледзець магчымасць выдачы адзінага праязнога дакумента, які прызнаюць усе краіны Рады Еўропы.
Рада Еўропы таксама прапануе распрацаваць нейкае прававое рашэнне на выпадак, калі беларусаў у выгнанні стануць пазбаўляць грамадзянства, і яны застануцца без сапраўдных дакументаў.
Асамблея заклікае не патрабаваць ад беларусаў дакументаў, якія можна атрымаць толькі ў дзяржаўных органах Беларусі — напрыклад, даведкі аб несудзімасці або апастылі на дакументы. Таксама ў дакуменце ёсць заклік не экстрадаваць беларусаў з чырвонай карткай Інтэрпола, выдадзенай на патрабаванне рэжыму Лукашэнкі.
ПАРЕ просіць улады еўрапейскіх краін матываваць банкі не дыскрымінаваць грамадзян Беларусі — падзяляць беларусаў і рэжым Лукашэнкі.
Таксама ў дакуменце ёсць прапановы па падтрымцы беларускай культуры і адукацыі на беларускай мове для дзяцей эмігрантаў, беларускамоўных выдавецтваў і беларускіх навукоўцаў у выгнанні.
Большасць гэтых прапаноў былі выпрацаваныя на канферэнцыі ў Люксембургу з удзелам прадстаўнікоў ПАРЕ і беларускіх дэмакратычных сіл у чэрвені.
Прапагандыстка АНТ Наталля Стэльмах змяніла імя на Наці Рышна і зарабляе ў Мексіцы на шаманах і наркатычных грыбах50
Каментары