Хаця дата ўваходжання ў еўразону Балгарыі застаецца пад пытаннем, краіна распрацавала свой дызайн манет.
Калі дакладна Балгарыя ўвойдзе ў еўразону, пакуль невядома. Пераход першапачаткова планаваўся на 1 студзеня 2024 года, але быў перанесены на год з-за высокай інфляцыі. 26 ліпеня 2024-га парламент краіны прыняў рашэнне, якое абавязала ўрад паскорыць працэс увядзення адзінай еўрапейскай валюты.
Згодна з прынятым актам, Балгарыя паспрабуе ўвайсці ў еўразону 1 ліпеня 2025 года. Калі гэта адбудзецца, то яна стане першай краінай, якая пяройдзе на еўра ў сярэдзіне года, а не на пачатку.
Яшчэ зімою гэтага года Нацыянальны банк Балгарыі зацвердзіў дызайн нацыянальнага боку васьмі манет — 1 і 2 еўра, а таксама 1, 2, 5, 10, 20 і 50 еўрацэнтаў.
Як вядома, у еўраманет ёсць агульны бок і нацыянальны бок. На нацыянальным абавязкова адлюстроўваецца кола з 12 зорак, што адпавядае іх колькасці на сцягу ЕС.
Канцэпцыя новых манет у цэлым паўтарае дызайн балгарскіх леваў і стоцінак, якія знаходзяцца ў звароце сёння. На аверсах усіх еўрацэнтаў будзе размешчаны Мадарскі вершнік, які паражае льва. Над вершнікам на кірыліцы будзе надпіс «БЪЛГАРИЯ», а пад ільвом — «СТОТИНКИ». Справа будзе пазначаны год выпуску.
На балгарскіх еўраманетах наміналам 1 еўра будзе змешчаны партрэт аднаго з найбольш ушанаваных святых Балгарскай праваслаўнай царквы — прападобнага Іаана Рыльскага (каля 876 — 946).
На аверсе 2 еўра — партрэт іераманаха Паісія Хілендарскага (1722—1773), аўтара «Славяна-балгарскай гісторыі пра народаў і цароў балгарскіх», якая ўтрымлівала заклікі да абуджэння нацыянальнай самасвядомасці і культурнага адраджэння краіны.
Яшчэ вясной планавалася зрабіць да 1 мільёна еўра-манет з нацыянальным бокам Балгарыі для праверкі якасці манет і сертыфікацыі Балгарскага манетнага двара.
Пасля таго як Еўрапейскі савет ухваліць далучэнне Балгарыі да еўразоны і будзе завершана сертыфікацыя Балгарскага манетнага двара, пачнецца рэгулярная вытворчасць еўраманет з нацыянальнымі сімваламі для задавальнення попыту ў краіне, калі еўра стане афіцыйным плацёжным сродкам.
Цяпер чытаюць
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі20
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары