Сталі вядомыя падрабязнасці смерці 35-гадовага фрыстайліста Максіма Гусціка
Амаль год таму загінуў прызёр ЧС па фрыстайле Максім Гусцік. Падрабязнасці гэтага здарэння так і не былі агучаныя. «Трыбуна» даведалася, як гэта адбылося.
9 снежня 2023 года ў Мінску загінуў 35-гадовы старшы трэнер зборнай Беларусі па фрыстайле Максім Гусцік. Ён быў бронзавым медалістам чэмпіянату свету — 2015, шматразовым прызёрам этапаў Кубка свету і ўдзельнікам дзвюх Алімпіяд.
У афіцыйных каналах паведамілі толькі сам факт гібелі Гусціка. Падрабязнасцей за амаль год пасля гэтага так і не было.
Па інфармацыі «Трыбуны», вечар пятніцы 8 снежня 2023 года Гусцік праводзіў, адпачываючы сумесна з некалькімі таварышамі.
Прыкладна ў 1:30 ночы ўжо 9 снежня мужчыны апынуліся ля станцыі метро «Пушкінская» на праспекце Пушкіна, які хацелі перайсці.
Як піша «Трыбуна», яны выбралі для гэтага не падземны пераход, які з'яўляецца адзінай там легальнай магчымасцю перасекчы васьміпалосную дарогу. Кампанія, парушаючы ПДР, пайшла наўпрост па праезнай частцы, маючы намер пералезці праз невялікі плот у сярэдзіне яе.
Аднак на раздзяляльнай паласе ў Гусціка і іншага чалавека з кампаніі ўзнік слоўны канфлікт. Праз пару рэплік апанент экс-фрыстайліста нечакана штурхнуў яго. Гусцік не ўтрымаўся на нагах — паляцеў на праезную частку.
Менавіта ў гэты момант па праспекце ехала «Шкода». Яе 33-гадовы вадзіцель не чакаў, што каля яго машыны зімовай ноччу ў такой сітуацыі апынецца нейкая кампанія. Чалавек за рулём заўважыў яе ў апошні момант — калі ўжо ніяк не паспеў бы затармазіць.
Па трагічнай выпадковасці, Гусцік упаў галавой менавіта пад колы «Шкоды». Тая нават пасля гэтага спынілася не адразу — кіроўцу спатрэбіўся час, каб зразумець, што здарылася. Зрэшты, ён хутка вярнуўся на месца ДТЗ.
Да таго моманту Гусцік ужо не падаваў прыкмет жыцця. А траўма галавы аказалася настолькі жудаснай, што экс-фрыстайліста хавалі ў закрытай труне, піша выданне.
Чым скончылася праверка ДТЗ, суразмоўцы выдання не ведаюць.
«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць25
Каментары
Жорсткая Канстытуцыя, як у Балгарыі, для змянення якой патрабуецца 3/4 галасоў парламента ў трох паслядоўных галасаваннях у розныя дні. Мяняць Канстытуцыю іншым спосабам нельга.