У Парыжы сёння пачнецца першы судовы працэс супраць Жэрара Дэпард'ё — яго абвінавачваюць у сэксуальных дамаганнях
Па артыкуле аб сэксуальных дамаганнях яму пагражае да пяці гадоў пазбаўлення волі.
У Парыжы сёння пачнецца першы судовы працэс супраць Жэрара Дэпард'ё. Пасяджэнне пачнецца а 13:00 па мясцовым часе (15:00 па Мінску).
Вядомаму акцёру выстаўлены абвінавачанні ў сэксуальных дамаганнях у дачыненні да дзвюх жанчын падчас здымак фільма Les Volets Verts («Зялёныя аканіцы») у 2021 годзе, піша Bild.
Дэкаратарка і асістэнтка рэжысёра абвінавацілі Дэпард'ё ў сэксуальным гвалце, сэксуальных дамаганнях і сэксісцкіх абразах у лютым 2024 года. Адвакат акцёра Жэрэмі Асус заявіў, што Дэпард'е асабіста з'явіцца на сённяшняе пасяджэнне.
«Сведкі і доказы, якія ён прадставіць, пакажуць, што ён з'яўляецца толькі аб'ектам ілжывых абвінавачанняў. Мэта, якую пераследуюць пазоўшчыкі, толькі што была раскрытая ў патрабаваннях кампенсацыі — набыць ад 6 000 да 30 000 еўра», — дадаў адвакат.
Па словах відавочцаў, Дэпард'ё на здымачнай пляцоўцы цалаваў жанчын і хапаў іх за грудзі, а таксама ў цэлым паводзіў сябе непрыстойна, але толькі з тымі жанчынамі, якія знаходзіліся ў яго падначаленні.
«Я быў з ім на здымках. Ён монстр, якому ніколі не казалі «стоп», і ён працягваў», — падзяліўся калега Дэпард'ё, акцёр Мацьё Касавіц.
Некаторыя французскія тэлеканалы ўжо адмовіліся трансляваць фільмы з удзелам Жэрара Дэпард'ё. Акрамя таго, яго васковую статую ў парыжскім музеі Грэвен дэмантавалі, а таксама акцёра пазбавілі ордэна Ганаровага легіёна.
На думку кінакрытыкаў, фільм «Зялёныя аканіцы» стане апошнім у доўгай фільмаграфіі Дэпард'ё. Па артыкуле аб сэксуальных дамаганнях яму пагражае да пяці гадоў пазбаўлення волі.
Агулам супраць Жэрара Дэпард'ё разглядаюцца пяць судовых іскаў. 21 жанчына заявіла пра дамаганні з яго боку.
Былога каліноўца, якога затрымалі ў В’етнаме, імгненна выдалі спецслужбам Лукашэнкі ФОТА47
Каментары