«Грузіць сябе і іншых»: былы памочнік Лукашэнкі Ігар Брыло бярэ на сябе віну ў прамысловых аб'ёмах
Ужо год цягнецца «малочная справа», у якой цэнтральнымі фігурамі зрабілі экс-міністра сельскай гаспадаркі Ігара Брыло і спонсара першай прэзідэнцкай кампаніі Лукашэнкі Генадзя Скітава. Следства цягнецца анамальна доўга. Крыніцы кажуць, што замінка ў Скітаве, які катэгарычна адмаўляе віну, тады як Брыло прызнае ўсё.
«Колькі маіх знаёмых саджалі па якіх заўгодна прычынах, але ніхто яшчэ так сябе не закапваў. [Брыло] беспардонна грузіць сябе і іншых», — сказаў «Нашай Ніве» суразмоўца з Барысава, якому ў агульных рысах вядомы ход расследавання.
«Малочная справа» перадусім узнікла вакол дзеячаў з Барысава — Ігара Брыло, які на момант затрымання быў памочнікам Лукашэнкі па Віцебскай вобласці, і Генадзя Скітава, які ўзначальваў магілёўскую «Бабушкину крынку».
У маладосці Скітаў ездзіў на блатной педалі, але змяніў жыццёвую траекторыю пасля таго, як блізкі сябар ягонага бацькі — Мікалай Дамашкевіч, — стаў цэнтральнай фігурай у штабе Лукашэнкі на выбарах-1994.
Па версіі, якую ў вузкіх колах распаўсюджваў сам Скітаў, яны з братам падтрымалі грашыма кампанію маладога кандыдата.
Так яно было ці не, дакладна невядома, але факт у тым, што Генадзя Скітава з братам вынесла з атачэння крымінальнага аўтарытэта «Зайца» ў Кіраўніцтва справамі Лукашэнкі.
А Ігар Брыло, калі працаваў ветэрынарам, быў падначаленым Скітава.
Як сцвярджаюць нашы суразмоўцы, старыя знаёмыя, трапіўшы ў складаныя жыццёвыя абставіны, паводзяць сябе па-рознаму.
Маўляў, Брыло актыўна дае паказанні — і на сябе, і на іншых. Наступствам стала тое, што «народ ездзіць на допыты, каб выслухаць і дэзавуяваць то адну гісторыю, то іншую». Па ацэнцы суразмоўцаў, такое адбываецца не толькі ў Барысаве, але і ў іншых раёнах.
«Мне здаецца, ужо з сотню чалавек з сельскай гаспадаркі за гэты час схадзілі на допыты, і ў асноўным па Брыло. А Скітаў, як мы разумеем, пайшоў «у адмову» і маўчыць», — сказаў наш суразмоўца.
Нагадаем, пра першыя затрыманні па «Малочнай справе» «Нашай Ніве» стала вядома акурат год таму, 1 лістапада 2023 года.
Пазней стала вядома, што пад следства трапіў кіраўнік «Бабушкінай крынкі» Генадзь Скітаў (Элькінд). Неўзабаве пасля яго з працы знік і на той момант памочнік Лукашэнкі па Віцебскай вобласці, экс-кіраўнік Міністэрства сельскай гаспадаркі Ігар Брыло.
Чытайце таксама: Быў Элькінд, стаў Скітаў. Гісторыя дырэктара «Бабушкінай крынкі» і закуліссе імперыі кіраўніцтва спраў Лукашэнкі
Былога каліноўца, якога затрымалі ў В’етнаме, імгненна выдалі спецслужбам Лукашэнкі ФОТА51
Каментары