Віктар Бабарыка сустракае дзень нараджэння ў невядомасці — калі ён жывы
Прэтэндэнту на пасаду прэзідэнта сёння споўніўся 61 год. З ім няма абсалютна ніякай сувязі з 25 красавіка 2023 года.
У зняволенні Віктар Бабарыка сустракае ўжо пяты дзень народзінаў. Столькі сама ў закладніках трымаюць ягонага сына Эдуарда.
Аднак што з ім, дзе ён і нават ці жывы, а калі жывы, то чаго ад яго дабіваюцца ізаляцыяй — ніякай інфармацыі няма.
Больш за паўтара года з палітыкам не было ніякай сувязі.
Па інфармацыі ад былога зняволенага калоніі, вязні апошні раз бачылі Віктара Бабарыку ў памяшканні камернага тыпу наваполацкай калоніі № 1 у лістападзе 2023 года, гэта значыць год назад. Ён ужо тады быў у поўнай ізаляцыі ад іншых зняволеных.
Палітзняволеных рангу Бабарыкі і так утрымліваюць у катавальных умовах. Вядома, што ў нейкі момант яго паспрабавалі прымусіць прыбіраць прыбіральні. Калі адмаўляешся, гэта жорсткае непадпарадкаванне рэжыму. І гэта падстава, каб цябе зачынілі ў ШІЗА або ў ПКТ. Калі згаджаешся — даюць паперу пра перавод цябе ў нізкі статус. Натуральна, мыць прыбіральні Віктар Бабарыка адмовіўся, і яго зачынілі ў ПКТ, а потым у ШІЗА.
Пры гэтым умовы, паводле сведчанняў былых палітвязняў, у ПК № 1 здольныя стварыць сапраўды нечалавечыя. Вокны ў штрафным ізалятары не зачыняюцца ўвесь год, нават калі на вуліцы мінус 30 °С. Зняволеныя вымушаныя завешваць іх ручнікамі або анучамі, але за гэта іх таксама могуць пакараць дадатковым тэрмінам.
А каманда зверху зрабіць рэжым утрымання максімальна строгім прыйшла адносна Бабарыкі прыкладна ў лютым 2023 года. Да яго перасталі пускаць адваката.
25 красавіка 2023 года Віктара Бабарыку з калоніі павезлі ў шпіталь. Паводле інфармацыі, перададзенай журналістам працаўнікамі больніцы, 27 красавіка палітык быў у хірургічным аддзяленні ў стане сярэдняй цяжкасці. Пазней праваабаронцам стала вядома, што Бабарыку перавялі ў турэмны шпіталь пры СІЗА № 1 у Мінску. Пазней Віктара Бабарыку вярнулі ў калонію.
Паводле сведчання былога палітвязня, вясну і лета 2023 года Бабарыка правёў у калоніі ў ПКТ, у поўнай ізаляцыі ад іншых вязняў. След Віктара Бабарыкі згубіўся ў лістападзе 2023-га, калі яго бачылі ў калідоры ПКТ.
«У пачатку 2024 года да мяне дайшла не стоадсоткавая інфармацыя, што ў калоніі Віктара Бабарыкі няма. Нібыта прыехалі людзі ў масках, без апазнавальных знакаў, пагрузілі яго і павезлі. Прычым калі везлі, я збіраўся выходзіць са сталоўкі, але ўсім забаранілі. Мы стаялі і не разумелі, што адбываецца. У якім кірунку яго павезлі, ці вярнулі, дзе ён, ніхто не ведае», — адзначае экс-палітвязень. Але гэта няпэўная інфармацыя.
Віктар Бабарыка нарадзіўся ў Мінску ў 1961 годзе. Ён доўгі час узначальваў Белгазпрамбанк, быў адным з самых шчодрых мецэнатаў краіны. У 2020 годзе прыняў рашэнне балатавацца ў прэзідэнты, сабраў рэкордную колькасць подпісаў у падтрымку сваёй кандыдатуры і адразу ўзначаліў перадвыбарчыя рэйтынгі. Лукашэнкаўцы тут жа пасля гэтага, у чэрвені 2020-га, яго арыштавалі. У зняволенні апынуліся і ягоны сын Эдуард, а таксама кіраўніца ягонай ініцыятыўнай групы Марыя Калеснікава.
Цяпер чытаюць
Бабарыка зоймецца бізнэсам — ужо адкрыў кампанію ў Германіі5
Бабарыка зоймецца бізнэсам — ужо адкрыў кампанію ў Германіі
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1212
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу12
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары