Зяленскі пазбавіў звання заслужанай артысткі спявачку, з якой спяваў Лукашэнка
Прэзідэнт Украіны падпісаў указ аб пазбаўленні ўзнагарод і званняў 34 чалавек, якіх абвінавачваюць у здрадзе або апраўданні расейскай агрэсіі.
У першы спіс трапілі былыя чыноўнікі, народныя дэпутаты, кіраўнікі СБУ і Генпракуратуры, пракуроры, артысты, а таксама расійскія палітычныя, рэлігійныя і культурныя дзеячы. Усе яны пазбаўлены дзяржаўных узнагарод Украіны на бестэрміновы час.
Дзесяці з іх прымянілі максімальны набор санкцый — 21 від. Гэта не толькі пазбаўленне дзяржаўных узнагарод Украіны, але і блакаванне актываў, ануляванне ліцэнзій і дазволаў, поўнае спыненне гандлёвых аперацый, паведамляе прэс-служба Зяленскага.
Званне «Народны артыст Украіны» пазбавілі Філіпа Кіркорова, Мікалая Баскава, Аляксандра Малініна і Ігара Крутога. Забралі званне «Заслужаная артыстка Украіны» ў Таісіі Павалій — адной з любімых спявачак Лукашэнкі. Ён спяваў разам з ёй на Купалле ў 2018 годзе, а таксама быў заўважаны ў танцах пад яе кампазіцыі. У Украіне Павалій, якая часта наведвае Беларусь, абвінавачваюць у апраўданні расійскай агрэсіі і калабаранцтве.
Таксама пазбавілі звання «Заслужаная артыстка Украіны» папулярную спявачку Ані Лорак.
Дзяржаўныя ўзнагароды забралі ў экс-прэм'ера Мікалая Азарава, былога дэпутата Віктара Медведчука, былога генпракурора Віктара Пшонкі і іншых экс-дзяржслужачых і палітыкаў. Пазбавілі ордэна Яраслава Мудрага і патрыярха Кірыла.
Напярэдадні Вярхоўная Рада Украіны падтрымала законапраект, які прадугледжвае пазбаўленне дзяржаўных узнагарод Украіны асоб, асуджаных за цяжкія або асабліва цяжкія злачынствы, крымінальныя правіны супраць асноў нацыянальнай бяспекі Украіны, супраць міру, бяспекі чалавецтва і міжнароднага правапарадку, а таксама за асобныя злачынствы супраць грамадскай бяспекі; асоб, якія прапагандуюць дзяржаву-агрэсара або апраўдваюць акупацыю Украіны.
Цяпер чытаюць
На будынку Ліцэя БДУ павесілі банэр з забітым кадэбістам Нірванай, а вучняў адвезлі на яго магілу25
Каментары