Ад анімацый да біяграфій і псіхалагічных трылераў — фільмы, якіх не было ў масавым пракаце, а якія варта пабачыць.
Многія выдатныя кінастужкі застаюцца па-за ўвагай шырокай аўдыторыі — ці то з-за абмежаванага бюджэту на рэкламу ці таму, што змаглі трапіць далёка не ва ўсе кінатэатры, або з іншых прычын. Кінакрытык і журналіст The Wall Street Journal Кайл Сміт сабраў дзесяць такіх фільмаў амерыканскай вытворчасці. Многія з іх ужо можна паглядзець дома. Вось яны:
«Asleep in My Palm» (літаральна: «Яна спіць у маёй далоні»)
Дэбютны фільм сцэнарыста і рэжысёра Генры Нэльсана (Henry Nelson), дзе галоўную ролю выконвае яго бацька — вядомы акцёр другога плана Цім Блэйк Нэльсан. Фільм распавядае пра Тома (у выкананні Ціма Нэльсана) і Бэт Эн (Хлоя Кервін), бяздомнага бацьку і яго дачку, якія жывуць каля каледжа ў сельскай мясцовасці Агаё, спрабуючы перажыць зіму.
Фільм даследуе тэмы бацькоўства і сацыяльнага класу, раскрываючы праблемы, з якімі яны сутыкаюцца, і сувязь, якую яны падзяляюць. Ён таксама закранае патрэбу дачкі ў незалежнасці і паказвае яе сэксуальнае даспяванне, у той час як бацька спрабуе ўцячы ад свайго гвалтоўнага і канфліктнага мінулага. Хоць бацька — злодзей, ён аказваецца выдатным настаўнікам у практычных пытаннях.
Фільм даступны на «Prime Video».
«Perfect Days» («Ідэальныя дні»)
Нягледзячы на намінацыю на «Оскар» у мінулым годзе, гэты спакойны, але захапляльны фільм толькі з часам пачаў даходзіць да шырокага гледача. Вім Вендэрс (Wim Wenders) зняў простую, элегантную, амаль бясслоўную кінастужку пра сціплага прыбіральшчыка (Коджы Якушо) у Токіа, які ўмее знаходзіць асалоду ў самых звычайных рэчах.
Глядзець гэтае кіно — «як трапіць на дзэн-семінар, дзе навучаюць знаходзіць радасць у факце існавання», — лічыць Кайл Сміт.
Фільм даступны на «Hulu».
«Coup de Chance» («Пашэнціла!»)
Вудзі Ален зняў свой 50-ы фільм у Парыжы ды па-французску, зыходзячы з таго, што ніхто з буйных амерыканскіх дыстрыб’ютараў ім не зацікавіцца. «І сапраўды, так і здарылася, а дарма, — мяркуе Кайл Сміт. — Гэта стыльны трылер і найлепшая праца рэжысёра за апошняе дзесяцігоддзе».
У цэнтры ўвагі — жонка багатага мужчыны (Лу дэ Лааж), якая ступае на небяспечны шлях, завёўшы флірт з панурыстым на выгляд пісьменнікам (Нільс Шнэдар) і спрабуючы хаваць гэта ад мужа (Мельвіль Пупо).
Фільм даступны на DVD/Blu-ray.
«Daddio» («Татка»)
90-хвілінная паездка на таксі з аэрапорта імя Джона Кэнэдзі становіцца месцам для шчырай дыялогавай драматургіі паміж маладой дамай з вышэйшага сацыяльнага слоя (Дакота Джонсан) і яе кіроўцам, мудрым мужчынам старэйшага ўзросту (Шон Пэн).
Кіроўца правакуе яе на развагі пра самае інтымнае. Да канца паездкі абодва даведаюцца адно пра аднаго столькі, што становіцца амаль невыносна ўсвядоміць: гэта быў іх адзіны сумесны шлях у жыцці.
Сцэнар Хрысці Хол (Christy Hall) поўны дасціпных і нечаканых паваротаў, як і рэжысёрскі падыход аўтаркі.
Даступны на «Netflix».
«Memoir of a Snail» («Мемуары слімака»)
Аўстралійскі аніматар Адам Эліят (Adam Elliot) напісаў сцэнар і зняў гэты дзіўны і мілы фільм у фармаце стоп-моўшн, з рэйтынгам R з-за шэрагу «дарослых» тэм.
Гэтая сумная і адначасова дасціпная гісторыя распавядае пра брата і сястру, чые бацькі паміраюць занадта рана. Дзяцей разлучаюць і адпраўляюць у розныя прыёмныя сем’і ў розных кутках Аўстраліі, і яны мараць, як бы зноў апынуцца разам.
«Memoir of a Snail» — фантастычная, пяшчотная і цёплая карціна пра любоў у сям’і і пра тое, як эксцэнтрычнасць можа зрабіцца формай выратавання.
Даступна ў рамках паслугі Video on Demand (VOD).
«Oddity» («Дзіўнасць»)
Ірландскі рэжысёр і сцэнарыст Дэміян Маккарці (Damian McCarthy) стварыў сапраўды напружаны трылер пра жанчыну, якой пагражае небяспека, і яе сястру-блізнятку, якая мае экстрасэнсорныя здольнасці. Абедзве ролі цудоўна выканала Кэралін Брэкэн.
Дзеянне адбываецца ў адасобленай сядзібе, дзе, імаверна, бываюць прывіды.
«Гэта фільм пра сутыкненне духоўнасці і навукі, жанчыны і мужчыны, а фінал выходзіць вусцішна дасканалым», — піша Сміт. Даступны на DVD/Blu-ray і ў рамках VOD.
«Back to Black» («Назад да чорнага»)
«Гэтая біяграфічная драма пра кароткае жыццё спявачкі рэтра-соўлу Эмі Уайнхаус — правал з гледзішча кінакрытыкі і камерцыйнага поспеху», — піша Сміт і дадае: «Аднак стала сапраўднай творчай перамогай дзякуючы неверагоднай ролі Марысы Абэлы».
Яна ўвасобіла працоўнае дзяўчо, якое пераўтварылася ў пакутлівую ікону пачатку 2000-х. Складаныя адносіны Эмі з яе мужам Блэйкам Філдэрам-Сівілам (цудоўна сыграным Джэкам О’Конэлам у вобразе прывабнага «бандзюгана») — толькі адзін з мноства аспектаў яе жыцця, атручанага залежнасцямі.
Фільм Сэм Тэйлар-Джонсан не спрабуе звесці гэтую таленавітую, але праблемную жанчыну да ролі ахвяры, а паказвае яе супярэчлівы свет з усімі адценнямі.
Даступны на «Prime Video».
«Piece by Piece» («Па кавалачках»)
«Пускаць у кінатэатрах гэты шалёны дакументальны фільм — рызыкоўны крок», — адзначае Сміт і дадае: «Але расповед пра жыццё і творчасць Фарэла Уільямса (Pharrell Williams), створаны з дапамогай анімацыі з дэталяў Lego, аказаўся чароўна прывабным эксперыментам».
Прыемны візуальны стыль арганічна спалучаецца з бадзёрым характарам самога Фарэла, які распавядае пра сваю працу над такімі хітамі, як «Get Lucky» або «Blurred Lines», а таксама пра свой уласны бестселер «Happy».
Фільм даступны на DVD/Blu-ray і ў рамках VOD.
«September 5» («5 верасня»)
Гэта камерная драма пра журналістаў, якія апынуліся ў цэнтры нечаканага крызісу, калі палесцінскія тэрарысты захапілі членаў ізраільскай алімпійскай дэлегацыі падчас Алімпійскіх гульняў у Мюнхене 5 верасня 1972 года.
Мы бачым, як прэзідэнт ABC Sports Рун Арледж (яго спакой і стрыманасць выдатна перадае Пітэр Сарсгард) паспешліва перабудоўвае праграму перадач. Фільм прымушае задумацца над шэрагам складаных пытанняў: нерашучасць дзяржаўных уладаў у справе прымянення сілы, этыка журналісцкай працы — усё гэта на фоне гібелі людзей у рэальным часе.
Пакуль што толькі ў кінатэатрах.
«Slingshot» («Рагатка»)
Гэта навукова-фантастычная драма пра канфлікт паміж трыма астранаўтамі (Кейсі Эфлек, Лоўрэнс Фішбарн і Тамер Капон), якія павінны выканаць складаны манеўр у космасе. Атмасфера фільма нагадвае «Зону змяркання» (The Twilight Zone).
Рэжысёр Мікаэль Хафстром (Mikael Håfström) стварыў эфект пастаяннай нестабільнасці, калі герой Кейсі Эфлека ўсё больш блытаецца, імкнучыся зразумець, што ж у рэальнасці адбываецца на борце карабля.
Гэтая карціна дынамічна паказвае, як лёгка збіцца з курсу нават выдатна абдуманай касмічнай аперацыі.
Даступна на DVD/Blu-ray і ў рамках VOD.
Каментары