Blue Origin Джэфа Безаса ўпершыню запусціла ракету на арбіту. У SpaceX з’явіўся сур'ёзны канкурэнт

Ракета New Glenn стартавала з касмадрома на мысе Канаверал у Фларыдзе а 02:02 па мясцовым часе.

New Glenn, названая ў гонар Джона Глена (першага амерыканскага астранаўта, які выйшаў на арбіту Зямлі больш за 60 гадоў таму), прайшла лінію Кармана, міжнародна прызнаную мяжу касмічнай прасторы, паведамілі ў кампаніі.

Як і канкурэнты з SpaceX Ілана Маска, Blue Origin хацела пасадзіць ракету-носьбіт, якая вывела New Glenn у космас, на пасадачную платформу ў акіяне, але гэтая частка місіі не ўдалася. Разгонны блок быў страчаны пасля аддзялення ад ракеты.

Blue Origin кідае выклік Ілану Маску ў барацьбе за панаванне ў космасе. Абедзве кампаніі распрацоўваюць самыя магутныя на сённяшні дзень ракеты-носьбіты. Безас у гэтай гонцы апынуўся ў становішчы даганятага, і паспяховы запуск New Glenn для яго — вялікі крок наперад. «Усё толькі пачынаецца», — сказала прадстаўніца Blue Origin пасля запуску.

Ілан Маск ужо вітаў поспех Blue Origin у сваёй сацсетцы X. « Віншую з дасягненнем арбіты з першай спробы!»— напісаў ён. Безас заснаваў кампанію Blue Origin 25 гадоў таму, заявіўшы, што хоча, каб «мільёны людзей працавалі і жылі ў космасе».

На працягу многіх гадоў кампанія адпраўляла да мяжы зямной атмасферы невялікую ракету New Shepard. На ёй адпраўляліся пасажыры і карысныя грузы, у тым ліку і сам Безас у 2021 годзе.

Безас пакінуў пасаду генеральнага дырэктара Amazon у 2021 годзе, каб засяродзіцца на працы ў Blue Origin. Уплыў Безаса і яго прызначэнне новага кіраўніцтва Blue Origin, падобна, змяніла культуру кампаніі і паскорыла распрацоўку New Glenn, лічыць карэспандэнт Бі-бі-сі па пытаннях навукі Палаб Гош. Падыход SpaceX да распрацоўкі касмічных апаратаў прыкметна адрозніваецца ад НАСА або любой іншай прыватнай кампаніі.

Нормай у індустрыі лічыцца дакладная распрацоўка і тэставанне, інжынеры таксама імкнуцца мінімізаваць рызыкі пры стварэнні сістэм. SpaceX, наадварот, хутка ўкараняла інавацыі, хутка цярпела няўдачы і хутка на іх вучылася: толькі ў мінулым годзе яна здзейсніла 134 запуску.

Пры распрацоўцы сістэм SpaceX пад назвай Falcon і Starship ракеты рэгулярна выбухалі, але кожны выпрабавальны палёт праходзіў лепш папярэдняга. У выніку кампанія імклівымі тэмпамі распрацоўвала новыя, больш танныя спосабы вываду апаратаў у космас. Ракета New Glenn магутней самага папулярнага стварэння SpaceX, Falcon 9.

Яна таксама можа несці больш спадарожнікаў, і Безос хоча выкарыстоўваць яе ў рамках свайго праекта Kuiper, мэтай якога з'яўляецца разгортванне тысяч нізкалётных спадарожнікаў для шырокапалоснай інтэрнэт-сувязі. Гэты праект будзе наўпрост канкураваць з сэрвісам Starlink Маска.

Аднак Starship — новая ракета кампаніі Маска — пераўзыходзіць New Glenn па магутнасці і карыснай нагрузцы. У чацвер чакаецца яе сёмы выпрабавальны палёт.

Некаторыя эксперты сцвярджаюць, што паспяховая ракета New Glenn створыць рэальную канкурэнцыю паміж дзвюма кампаніямі і можа знізіць кошт касмічных аперацый. Гістарычна засваенне космасу вядзецца ў асноўным на дзяржаўныя сродкі. Але амерыканскае касмічнае агенцтва NASA ўсё часцей заключае кантракты з прыватнымі кампаніямі на пастаўку ракет і іншых касмічных паслуг.

SpaceX Ілана Маска ўжо атрымала кантракты на мільярды даляраў, а ягоныя цесныя стасункі з абраным прэзідэнтам ЗША Дональдам Трампам могуць дапамагчы яшчэ больш умацаваць кампанію.

• 4
• 0
• 0
• 0
• 0
• 0
• 0
• 0