Ілан Маск выступіў на перадвыбарным мерапрыемстве «Альтэрнатывы для Германіі»
Амерыканскі мільярдэр і палітычны паплечнік Дональда Трампа Ілан Маск выступіў праз відэасувязь на перадвыбарным мерапрыемстве праварадыкальнай партыі «Альтэрнатыва для Германіі». Запіс выступу выкладзены ў сацсетцы X кіраўніцай гэтай партыі Алісай Вайдэль, піша «Радыё Свабода».
Мерапрыемства адбылося ва ўсходнегерманскім горадзе Гале 25 студзеня і стала афіцыйным стартам перадвыбарнай кампаніі партыі ў Бундэстаг. Выступ Маска, паведамляе Welt, слухалі ў зале каля 4,5 тысячы прыхільнікаў «Альтэрнатывы для Германіі».
Ілан Маск падчас выступлення заявіў прысутным, што ўхваляе іх гонар за прыналежнасць да германскай культуры: «Мы хочам, каб культуры ў свеце былі рознымі». Ён раскрытыкаваў нямецкі ўрад, назваўшы яго незацікаўленым у дабрабыце народа і абвінаваціўшы ў падаўленні свабоды слова.
Акрамя таго, Маск заклікаў прысутных «змагацца, змагацца, змагацца» «за вялікую будучыню Германіі» і сказаў, што яны «не павінны адказваць за памылкі бацькоў ці нават прадзедаў» і быць «занадта заклапочаныя гістарычнай віной».
Перад датэрміновымі выбарамі ў Бундэстаг «Альтэрнатыва для Германіі» прэтэндуе прыблізна на 20 працэнтаў галасоў выбаршчыкаў, прыводзіць перадвыбарчыя апытанні Politico.
Федэральны канцлер Германіі Олаф Шольц напярэдадні назваў падтрымку «Альтэрнатыва для Германіі» Маскам «абсалютна недапушчальнай».
«Ён падтрымлівае вельмі правых па ўсёй Еўропе, у Вялікабрытаніі, у Германіі, у многіх, многіх іншых краінах, і гэта цалкам непрымальна… Гэта ставіць пад пагрозу дэмакратычнае развіццё Еўропы, гэта ставіць пад пагрозу нашу супольнасць», — цытуе кіраўніка ўрада AP.
На інаўгурацыі прэзідэнта ЗША Дональда Трампа 20 студзеня Маск у сваёй прамове дзякаваў выбаршчыкам Трампа, пасля чаго прыклаў руку да сэрца, а затым кінуў яе ўверх. Такім жэстам раней у ЗША суправаджалі клятву вернасці ЗША, але ў 1942 годзе яго замянілі жэстам рукі на сэрца. Многім жэст у выкананні Маска нагадаў нацысцкае прывітанне.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці48
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары