«Як Польшча некалі прайшла шлях да волі, гэтак і беларусы зробяць тое ж самае». Ціханоўская выступіла на Форуме Касцюшкі

Праграма мерапрыемстваў пачалася ўскладаннем кветак да помніка суднавым рабочым горада, якія загінулі падчас трагічных падзеяў снежня 1970 года, паведамляе яе прэс-служба.

У выступе, які адкрываў івэнт, Святлана Ціханоўская падкрэсліла: ідэалы, за якія змагаўся Касцюшка — свабода, роўнасць і народны суверэнітэт — актуальныя і сёння. Яна адзначыла, што незалежнасць і дэмакратыя патрабуюць не толькі ўнутранай стойкасці, але і міжнароднай падтрымкі: 

«Як Польшча некалі прайшла свой шлях да волі, гэтак і беларусы зробяць тое ж самае. Гэты шлях можа быць доўгім, але гэта адзіны шлях, які трэба прайсці. Гэта адзіны спосаб забяспечыць нашае выжыванне і росквіт».

Святлана Ціханоўская зазначыла, што форумам у Гданьску аддаецца павага агульным змагарам за свабоду, такім як Тадэвуш Касцюшка і Кастусь Каліноўскі, — «людзям, у якіх, магчыма, было мала шанцаў на перамогу, але якія ўсё роўна вырашылі змагацца за справядлівасць».

«Мы аддаём даніну павагі ўсім беларускім журналістам, актывістам, мастакам, якія, нягледзячы на рэпрэсіі, нягледзячы на русіфікацыю, працягваюць тварыць, наводзіць масты, распаўсюджваць праўду і супрацьстаяць «рускаму свету». І я прашу нашых міжнародных сяброў, прысутных у гэтай зале, падтрымаць іх крытычна важную працу, асабліва цяпер, калі амерыканская дапамога была прыпыненая. Мы аддаём даніну павагі нашым палітычным зняволеным, уключаючы Анджэя Пачобута, Ігара Лосіка, Кацярыну Андрэеву або Марыю Калеснікаву, і тысячам іншых, якія знаходзяцца за кратамі. Яны не былі зламаныя, і мы таксама. Давайце не спыняць барацьбу за іх вызваленне», — сказала Святлана Ціханоўская.

Яна таксама згадала Марыю Зайцаву, якая загінула ва Украіне.

«Для мяне вялікі гонар бачыць сярод нас віцэ-міністра Аляксандра Мішчанку. Паважаны віцэ-міністр, беларускі народ падтрымлівае Украіну гэтак жа, як вы стаіце на перадавой за ўсіх нас. Мы таксама аддаём належнае ўсім смелым палітыкам, якія не баяцца выступіць супраць тыраніі. Напрыклад, прысутнаму тут міністру Кястуцісу Будрысу — нашаму літоўскаму сябру і саюзніку. Літва не толькі прыняла тысячы беларусаў, але і распачала справу супраць рэжыму ў Міжнародным крымінальным судзе. І мы заклікаем усе краіны падтрымаць гэтыя намаганні. Мы не павінны паддавацца шантажу дыктатараў. І мы ніколі не павінны здраджваць нашым каштоўнасцям», — дадала яна.

• 9
• 0
• 0
• 0
• 0
• 0
• 0
• 0