Вялікабрытанія прыпыніла пагадненне з Беларуссю аб пазбяганні падвойнага падаткаабкладання
Упраўленне падатковых і мытных збораў Вялікабрытаніі паведаміла аб прыпыненні дзеяння пагаднення аб пазбяганні падвойнага падаткаабкладання з Беларуссю. Беларускі бок пра гэтае рашэнне ўжо праінфармавала.
Удакладняецца, што з 1 красавіка 2025 года перастане дзейнічаць палажэнне, якое тычыцца падаткаў на прыбытак кампаній і іншых падаткаў, а з 6 красавіка — падаходнага падатку і падатку на прырост капіталу.
Падкрэсліваецца, што рашэнне прынятае ў адказ на дзеянні Беларусі.
Маецца на ўвазе, што ў сакавіку 2024 года Савет міністраў Беларусі прыняў пастанову № 164 «Аб пытаннях падаткаабкладання», якая, сярод іншага, прыпыніла да канца 2026 года «выкананне палажэнняў міжнародных пагадненняў аб пазбяганні падвойнага падаткаабкладання» з 27 «недружалюбнымі краінамі».
Гэта Аўстрыя, Балгарыя, Бельгія, Вялікабрытанія, Венгрыя, Іспанія, Данія, ЗША, Ірландыя, Італія, Кіпр, Латвія, Літва, Паўночная Македонія, Нідэрланды, Германія, Польшча, Румынія, Славакія, Славенія, Фінляндыя, Францыя, Харватыя, Чэхія, Швейцарыя, Швецыя, Эстонія.
Пад абмежаванні трапілі тры палажэнні пагаднення — аб дывідэндах, аб працэнтах, а таксама аб даходах ад адчужэння маёмасці. Некаторыя краіны ў адказ прыпынілі адпаведнае пагадненне з Беларуссю.
Каментары