Беластоцкія бізнэсоўцы просяць адкрыць пункты пропуску на мяжы з Беларуссю
Бізнэсмены з аб'яднання «Прадпрымальніцкі ўсход» (Przedsiębiorczy Wschód) рыхтуюцца падаць калектыўны пазоў супраць польскай дзяржавы праз закрыццё аўтамабільных пунктаў пропуску на мяжы з Беларуссю. Яны лічаць, што сваімі дзеяннямі ўрад абмежаваў іх свабоду прадпрымальніцкай дзейнасці, і хочуць кампенсацыі страчанай выгады, піша Most.
Аб сваіх намерах бізнэсмены заявілі на сустрэчы, прысвечанай другой гадавіне закрыцця пункт пропуску «Баброўнікі».
Яны прынеслі на імпрэзу свечкі і запалілі іх у знак таго, што мясцовы гандлёвы бізнэс забіты. Акрамя таго, яны трымалі ў руках плакаты «Адзін урад = іншы ўрад — адзін чорт», атаясамліваючы польскія і беларускія ўлады.
— Мы адчуваем сябе ашуканымі і цалкам страцілі надзею на лепшую будучыню. Таму ў бліжэйшы час мы разглядаем магчымасць падачы калектыўнага пазову да польскага Дзяржаўнага скарбу, таму што польская дзяржава сваімі дзеяннямі абмежавала нашу свабоду прадпрымальніцкай дзейнасці, — прыводзіць Radio Białystok словы прадпрымальніка Гжэгажа Капіцы.
Цяпер актывісты абмяркоўваюць дэталі пазову з юрыдычнай фірмай.
Страты — 800 млн злотых
Па дадзеных прадпрымальнікаў, у сярэднім турыст з Беларусі пакідаў у Польшчы 167 даляраў. Па іх падліках, з-за закрыцця пагранпераходаў з боку Гродзенскай вобласці толькі на не здзейсненых беларусамі пакупках Падляшша губляе 800 млн злотых. Пры гэтым прадпрымальнікі падкрэсліваюць, што мяжа з боку Люблінскага ваяводства застаецца адкрытай: там працуюць пасажырскі пункт пропуску «Брэст — Тарэспаль» і грузавы «Казловічы — Кукурыкі».
Эвеліна Грыгатовіч-Шумоўска падчас сустрэчы паведаміла, што пасля закрыцця пунктаў пропуску даходы яе кампаніі скараціліся на 40%, яна была вымушана звольніць ці перапрафіляваць працу 17 супрацоўнікаў.
Акрамя таго, прадстаўнікі бізнэсу абураліся, што, зачыніўшы пераходы, мясцовыя ўлады не далі людзям альтэрнатыўныя спосабы заробку.
Рух праз «Кузніцу» быў прыпынены на нявызначаны тэрмін у лістападзе 2021 года, а праз «Баброўнікі» — у лютым 2023 года, адразу пасля вынясення прысуду актывісту польскага паходжання і журналісту Анджэю Пачобуту.
Прыгранічны гандлёвы бізнэс неаднаразова звяртаўся да мясцовых улад з прапановай аднавіць рух. Але такое рашэнне наўрад ці будзе прынятае, бо Беларусь не выканала ўмовы, пастаўленыя Польшчай. Сярод іх — вызваленне Пачобута, спыненне міграцыйнага крызісу на мяжы і садзейнічанне ў знаходжанні мігранта, які забіў польскага салдата Матэвуша Сітэка.
Анжаліку Мельнікаву бачылі ў Мінску ў «Дана Моле»53
Каментары