Трамп і Зяленскі расказалі, пра што сёння размаўлялі паміж сабой па тэлефоне
12 лютага прэзідэнт ЗША Дональд Трамп пагаварыў з кіраўніком Расіі Уладзімірам Пуціным, а пасля звязаўся з прэзідэнтам Украіны Уладзімірам Зяленскім. Спачатку было вядома толькі пра факт апошняй размовы, але пасля абодва прэзідэнты паведамілі ў сацсетках пра тое, якія праблемы падчас яе абмяркоўваліся.
Паведамленне Трампа пра размову з Зяленскім у сацсетцы Truth Social было нашмат карацейшым, чым пра размову з Пуціным. Але ў ім прэзідэнт ЗША быў гэтак жа сама напоўнены аптымізмам:
«Я толькі што размаўляў з прэзідэнтам Украіны Уладзімірам Зяленскім. Размова прайшла вельмі добра. Ён, як і прэзідэнт Пуцін, хоча заключыць мір.
Мы абмеркавалі мноства тэм, звязаных з вайной, але ў асноўным сустрэчу, якая прызначаная на пятніцу ў Мюнхене і дзе дэлегацыю ўзначаляць віцэ-прэзідэнт Джэй Дзі Вэнс і дзяржаўны сакратар Марка Рубіа.
Спадзяюся, вынікі сустрэчы будуць станоўчымі. Прыйшоў час спыніць гэтую недарэчную вайну, падчас якой былі масавыя і зусім непатрэбныя смерці і разбурэнні. Хай дабраславіць Госпад народы Расіі і Украіны!», — напісаў Трамп.
Зяленскі, у сваю чаргу, напісаў пра вынікі сустрэчы ў тэлеграме:
«Толькі што гаварыў з Дональдам Трампам. Працяглая размова. Пра магчымасці дасягнуць міру. Пра нашу гатоўнасць працаваць разам на ўзроўні камандаў. Пра нашы тэхналагічныя магчымасці, у прыватнасці дроны і іншыя сучасныя вытворчасці.
Удзячны прэзідэнту Трампу за цікавасць да таго, што мы можам зрабіць разам. Абмеркавалі нашу размову са Скотам Бесэнтам і падрыхтоўку нашага новага пагаднення па бяспецы і эканамічным і рэсурсным узаемадзеянні.
Прэзідэнт Трамп праінфармаваў мяне пра дэталі сваёй размовы з Пуціным. Украіна больш за ўсіх хоча міру. Вызначаем нашы сумесныя з Амерыкай крокі, каб спыніць расійскую агрэсію і гарантаваць надзейны, працяглы мір.
Як сказаў прэзідэнт Трамп, let's get it done. Дамовіліся пра далейшыя кантакты і сустрэчы».
Пасля Зяленскі яшчэ раз закрануў пытанне размовы з Трампам у сваім традыцыйным вячэрнім звароце:
«Вельмі прадметныя перамовы са Злучанымі Штатамі Амерыкі. Была размова з прэзідэнтам Трампам — добрая размова, падрабязная. Я ўдзячны прэзідэнту Трампу за шчырую цікавасць да нашых агульных магчымасцяў, да таго, як мы можам разам наблізіць сапраўдны мір.
Працяглая размова. Мы абмеркавалі шмат нюансаў — дыпламатычных, ваенных, эканамічных, і прэзідэнт Трамп праінфармаваў мяне пра тое, што яму сказаў Пуцін.
Верым, што сілы Амерыкі дастаткова, каб разам з намі, разам з усімі партнёрамі даціснуць Расію і Пуціна да міру».
Што за 17-гадовы стартапер, які выліў цэбар хлусні на Лібера на радасць беларускім спецслужбам7
Каментары