Аляксандр Памідораў патлумачыў, чаму не прыйшоў на ўласны канцэрт у Познані
Музыка не з'явіўся на свой канцэрт, які мусіў адбыцца 5 сакавіка. Ён запэўніў «Нашу Ніву», што прычынай стаў не алкаголь, а тое, што ён проста праспаў.
«Наша Ніва» запыталася ў Аляксандра Памідорава, як так атрымалася.
«Канечне, шмат хто хоча (бо ведаюць мой бэкграўнд), каб гэта выглядала, што Памідор напіўся і ўсё прапала. Але я насамрэч праспаў. Быў выступ у Берліне з адным маім сябрам. Класна адыгралі, але з начоўкай у мяне там не склалася. Правёў ноч на вакзале ў Франкфурце, таму што не было цягнікоў. Сядзеў на лаве, задрамаў. Мне трохі пачысцілі кішэні, скралі 20 еўра, цыгарэты. Пасля паехаў адтуль у Познань, недзе а 10-й раніцы. Тут знайшоў хостэл, засяліўся недзе а 15-й, прылёг адпачыць. Прачнуўся толькі а 21-й. Ці то будзільнік не спрацаваў, ці то што.
Спрабаваў патэлефанаваць тым, хто арганізоўваў канцэрт. Не адказалі. І ў прасторы, дзе канцэрт мусіў быць, таксама. Мне толькі адзін прыяцель напісаў, што там некалькі чалавек прыйшло і што мяне чакалі. А з Познані мне ніхто нават не тэлефанаваў нічога. Так выглядае, што, можа, не так і патрэбны быў гэты канцэрт. Выбачаюся, што так выйшла. Стаміўся», — расказвае ён.
Аляксандр Памідораў прызнаўся, што выпівае, ён не робіць з гэтага таямніцы.
«Проста трэба часам мець галаву і разумець, калі трэба выпіваць, калі не.
Калі ёсць пэўныя падставы, чаму выпіваць не трэба, то ты проста гэтага не робіш. А калі ў цябе нічога сур'ёзнага на дзень не запланавана, чаму б і не выпіць.
У крытычнай сітуацыі, калі нешта здарылася дрэннае ці непрыемнае ў жыцці, вось тут, акурат, лепш не піць. У большасці я магу сказаць, што людзі п'юць, таму што няма што рабіць, нудна», — разважае артыст.
Каментары