Беларускі фермер паказаў, як трымерам рыхтуе клубніцы да сезону — мільёны праглядаў
Сяргей з Пінска вырошчвае ягады ў камерцыйных маштабах — ён падзяліўся лайфхакам.
Днямі фермер выклаў у тыктоку відэа, на якім ён «косіць» клубніцы бензінавай газонакасілкай з нестандартнымі насадкамі. Так ён прыбірае старое лісце і пасынкі. Самі клубніцы накрыты плёнкай, таму ад такой апрацоўкі саджанцы не церпяць. Пасля счышчанае лісце фермер прыбірае граблямі.
За некалькі дзён відэа набрала амаль 4 мільёны праглядаў і больш за 400 каментарыяў.
Адмысловую шчотку для клубніц фермер зрабіў уласнаручна. Для гэтага ён распілаваў звычайную шчотку на тры часткі, а потым прыкруціў іх да жалезнай насадкі на трымер, якая звычайна прадаецца ў камплекце з газонакасілкай.
Многія карыстальнікі звяртаюцца да фермера па парады. Напрыклад, калі пачынаць першую падкормку. «Пры тэмпературы грунту ад 13 градусаў і вышэй, бо фосфар не засвойваецца пры нізкай тэмпературы», — піша Сяргей.
Кагосьці цікавіць, ці пачынаць абразаць клубніцы ў Магілёве, дзе на выходных чакаецца да мінус 5 градусаў. «Пачакайце, перастрахуйцеся. Пасля маразоў і пачняце», — раіць фермер.
Пад ролікамі нямала каментарыяў на ўкраінскай мове. Сочаць за досведам пінскага фермера і іншыя замежнікі.
«Supper ideja», — напісала каментатарка з Латвіі.
«Oni to mają pomysły», — напісалі з Польшчы.
Першыя відэа пра вырошчванне ягад (апроч клубніц, Сяргей займаецца ажынамі і малінай) фермер пачаў публікаваць у лютым 2024 года. Ён дзеліцца, чым падкормлівае ягады, як абразае і палівае. Цяпер ён мае ў тыктоку амаль 21 тысячу падпісчыкаў.
Цяпер чытаюць
У Лагойску пекар адмаўляецца прадаваць свой хлеб пакупнікам, у якіх ёсць сабакі63
Каментары