Клімат Беларусі становіцца цяплейшым хутчэй, чым у большасці краін свету
Рэзкае змяненне клімату найбольш адчувальна закранула Усходнюю Еўропу. Гэта пагражае рэгіёну засухамі і экстрэмальнымі прыроднымі з'явамі.
Паводле апошніх дадзеных ААН, Еўропа — кантынент, дзе тэмпература павышаецца хутчэй за ўсё на планеце. І Беларусь увайшла ў спіс краін, дзе назіраецца найбольш істотнае пацяпленне, перадае Euronews.
Згодна з аналізам тэмпературных змяненняў за 2023 год, у Беларусі сярэднегадавая тэмпература ўзрасла на 2,7°C у параўнанні з базавым перыядам 1951-1980 гадоў. Гэта адзін з самых высокіх паказчыкаў у Еўропе і свеце.
Аналіз дзесяцігадовага сярэдняга значэння (2014-2023) паказвае, што Беларусь застаецца сярод краін, дзе тэмпература расце найбольш хутка. У спісе дзяржаў з самым імклівым пацяпленнем таксама апынуліся Малдова, Украіна, Расія, Эстонія, Латвія і Літва.
Чаму Еўропа награваецца хутчэй за іншыя кантыненты?
Эксперты адзначаюць, што пацяпленне ў Еўропе адбываецца ў два разы хутчэй, чым у сярэднім па свеце. Галоўныя прычыны гэтага з’явішча:
- Палярызацыя пацяплення — паўночныя рэгіёны награваюцца мацней за экватарыяльныя.
- Скарацілася колькасць аэразоляў — Еўропа значна паменшыла выкіды смогу, які раней часова блакаваў частку сонечнага выпраменьвання.
- Прыродныя фактары — змяненні ў цыркуляцыі атмасферы і стан марскога лёду ў Арктыцы таксама ўплываюць на тэмпературныя тэндэнцыі.
Якія рэгіёны Беларусі пацярпелі найбольш?
Беларусь геаграфічна размешчана на мяжы Усходняй і Цэнтральнай Еўропы, што робіць яе ўразлівай да глабальных кліматычных змяненняў.
Па словах кліматычных экспертаў, самыя высокія тэмпературныя паказчыкі фіксуюцца ў паўднёвых і ўсходніх рэгіёнах краіны. Тут тэмпература павышаецца хутчэй, чым у заходніх і паўночных абласцях.
На думку спецыялістаў, тэмпературныя тэндэнцыі ў Беларусі могуць прывесці да наступстваў, такіх як павелічэнне працягласці перыядаў засухі, змены ў сельскагаспадарчых умовах, рост экстрэмальных кліматычных з’яў, у тым ліку анамальных спёк і моцных ападкаў.
Кліматычныя даследчыкі падкрэсліваюць, што Еўропа павінна рыхтавацца да новага рэжыму надвор’я і прымаць меры па адаптацыі да хуткіх зменаў. Беларуская навука і экалагічныя ініцыятывы таксама павінны засяродзіцца на распрацоўцы стратэгій змякчэння кліматычных рызык.
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?15
Каментары