Памёр першы прэм'ер-міністр незалежнай Украіны Вітольд Фокін, паведамляе «Украінская праўда». Яму было 92 гады.
Пра смерць Вітольда Фокіна паведаміла ягоная ўнучка ў сацсетках.
Вітольд Фокін у савецкі час зрабіў сваю прафесійную кар'еру ў Дзяржплане УССР, а з 24 жніўня 1991 года па 1 снежня 1992-га кіраваў украінскім урадам, стаўшы такім чынам апошнім прэм'ерам савецкай Украіны і першым незалежнай.
Акурат на час ягонага прэм'ерства прыпала падпісанне Белавежскіх пагадненняў 8 снежня 1991 года, якія фактычна скончылі існаванне СССР «як геапалітычнай рэальнасці».
Тыя пагадненні афіцыйна падпісалі 6 чалавек — прэзідэнты Расіі і Украіны Барыс Ельцын і Леанід Краўчук, старшыня Вярхоўнага Савета Беларусі Станіслаў Шушкевіч, прэм'ер-міністры Беларусі і Украіны Вячаслаў Кебіч і Вітольд Фокін і першы намеснік старшыні расійскага ўрада Генадзь Бурбуліс.
Да сённяшняга дня Вітольд Фокін быў апошнім, хто з тых падпісантаў заставаўся жывы. Барыс Ельцын памёр у 2007 годзе, Вячаслаў Кебіч — у 2020-м, а Леанід Краўчук, Станіслаў Шушкевіч і Генадзь Бурбуліс — у 2022-м.
Пасля адстаўкі Фокіна з пасады прэм'ер-міністра ён пакінуў дзяржаўную службу. З 1993 года ён быў прэзідэнтам Міжнароднага фонду гуманітарных і эканамічных сувязяў Украіны з Расійскай Федэрацыяй, а з 18 жніўня па 30 верасня 2020 года выконваў абавязкі намесніка прадстаўніка Украіны ў кантактнай групе па мірным урэгуляванні сітуацыі на ўсходзе Украіны.
Цяпер чытаюць
Куды цяпер едуць вучыцца беларускія студэнты — топ краін і тэндэнцый8
Каментары