У Гродне патлумачылі, чаму лісы сталі часцей заходзіць у горад. Ці шмат сярод іх шалёных?
У Гродне ўсё часцей сустракаюць дзікіх ліс. Фота і відэа раз-пораз з'яўляюцца ў інтэрнэце, нязменна выклікаючы ўсеагульнае здзіўленне. Як лясны звер здолеў пранікнуць на гарадскія вуліцы і што яму там трэба? Ці небяспечная жывёліна для чалавека? Беручы пад увагу, што днямі ліса бязлітасна разадрала мясцовага ката, журналістка Telegraf.news задала гэтыя пытанні супрацоўніку Гродзенскага лясгаса.
Дзе ўжо бачылі ліс у Гродне?
Апошнім часам рудых гасцей раз-пораз заўважаюць у розных частках Гродна: на цэнтральных вуліцах, у заапарку, Румлёўскім парку, Азёрскай шашы, мікрараёне Альшанка — літаральна ўсюды.
Чаму заходзяць у горад?
Спецыялісты Гродзенскага лясгаса пацвердзілі: лісы сапраўды зачасцілі ў горад. І патлумачылі гэта тым, што людзі ўсё больш ступаюць на іх зямлю, пашыраючы межы населеных пунктаў бліжэй да лесу.
«А лісы — гэта такія жывёлы, якія не баяцца чалавека: заходзяць да яго, нападаюць, робяць шкоду. Яны вельмі смелыя і хітрыя. І так было заўсёды», — расказаў Віктар Маджаеўскі, ляснічы Гродзенскага лясніцтва.
Ён таксама адзначыў, што «гэты звер вельмі вынаходлівы, калі хоча есці. А цяпер у ліс якраз з'яўляюцца лісяняты, якіх трэба карміць, і самім адкарміцца пасля зімы».
«Таму яны і могуць заходзіць глыбей у населеныя пункты — шукаць сабе там паесці. Гэта адна з асноўных прычын, больш ніякіх. Чалавек набліжаецца да лесу — і ліса ідзе да чалавека, таму што ў яго ёсць сметніцы з ежай. Яна адчувае, што можна сабе там нешта накапаць і пачынае прывыкаць да горада», — дадаў Віктар Маджаеўскі.
«Шалёных не так ужо і шмат»
Ён і сам нярэдка бачыў ліс у горадзе. Прычым зусім разгубленых і шакаваных праз тое, што трапілі ў такое асяроддзе. Бо вакол людзі і машыны. Па словах ляснічага, «нярэдка жывёлы кідаюцца з боку ў бок і не ведаюць, куды ўцячы. А шалёных, у прынцыпе, не так ужо і шмат — гэта рэдкі выпадак».
Як зразумець, што ліса шалёная?
Па словах ляснічага, ліса пазбягае кантакту з чалавекам.
«Яна сама яго баіцца. Калі драпежнік на вас не рэагуе, то, верагодна, ён знаходзіцца ў замяшанні, адхіліў увагу на штосьці іншае, што адначасова адбываецца, ці не разумее, што падыходзіць хтосьці яшчэ. Такія сітуацыі бываюць», — патлумачыў ён.
І таксама дапоўніў, што ў кожным разе звер рана ці позна ўбачыць чалавека і пачне ўцякаць:
«Гэта нармальная, адэкватная рэакцыя здаровай лісы. Любая дзікая жывёліна, калі яна не хворая, пазбягае людзей».
Віктар Маджаеўскі запэўнівае, што няцяжка зразумець, шалёная ліса ці не.
«Калі бачыце, што яна не ўцякае, а, наадварот, ідзе да вас насустрач, трэба мяняць свой кірунак і шукаць, куды ад яе схавацца. Калі ўжо такое здарыцца. Але я думаю, наўрад ці. Нават калі ліса хворая, вельмі малаверагодна, што яна будзе спецыяльна нападаць на чалавека. Апошняму самому трэба справакаваць гэтую агрэсію», — растлумачыў ляснічы.
Што ж рабіць, калі вы той самы шчасліўчык, які ідзе па горадзе і бачыць лісу, якая бяжыць? Віктар Маджаеўскі заклікае ні ў якім разе не даганяць лісу і не спрабаваць яе пагладзіць.
«А то ў нас некаторыя бясстрашныя людзі думаюць, што гэта ўсё ж такі мірная жывёла. Не, нават нібыта бяскрыўдная вавёрка можа ўкусіць вельмі балюча», — нагадаў спецыяліст.
Ён таксама падкрэсліў, што пытанні шалёных ліс у Гродне адпрацоўвае ветэрынарная служба. Ніякія іншыя арганізацыі — ЖКГ або САГ — гэтым не займаюцца.
«Калі ў вас ёсць падазрэнні, што жывёла можа быць шалёнай, тэлефануйце ў ветэрынарную службу. А ўжо там спецыялісты прымуць меры, як яе бяспечна адлавіць і абследаваць. Усё трэба рабіць правільна», — сказаў на заканчэнне суразмоўца.
Цяпер чытаюць
Той самы масажыст расказаў, навошта здымаў голых кліентак21
Каментары