Галоўнага саперніка Эрдагана на прэзідэнцкіх выбарах у 2028 годзе афіцыйна намініравалі як аднаго з кандыдатаў ад партыі, піша Deutsche Welle.
Пратэсты ў Турцыі адбываюцца з 19 сакавіка — пасля арышту галоўнага апазіцыйнага палітыка і мэра Стамбулу Экрэма Імамоглу. Па інфармацыі МУС Турцыі, за гэты час у краіне затрымалі больш за тысячу чалавек.
«У перыяд з 19 па 23 сакавіка былі затрыманыя 1133 падазраваных у незаконнай дзейнасці», — паведаміў міністр унутраных спраў Алі Ярлікая ў сацыяльных сетках.
Ён заявіў, што сярод арыштаваных былі «асобы, звязаныя з 12 рознымі тэрарыстычнымі арганізацыямі».
Ярлікая дадаў, што падчас пратэстаў былі параненыя больш за 120 паліцэйскіх.
На фоне пратэстаў апазіцыйная «Рэспубліканская народная партыя» правяла сімвалічныя праймерыз, каб абраць Імамоглу сваім кандыдатам у прэзідэнты на выбарах, прызначаных на 2028 год.
Раней Стамбульскі ўніверсітэт заявіў, што збіраецца ануляваць дыплом Імамоглу — кваліфікацыю, якая з'яўляецца абавязковай для кандыдатаў у прэзідэнты Турцыі.
Экрэма Імамоглу затрымалі 19 сакавіка. Агенцтва dpa паведаміла, што мэра абвінавацілі ў кіраўніцтве злачыннай арганізацыяй і ў карупцыі. Турэцкае дзяржаўнае інфармагенцтва Anadolu сцвярджала, што ў дачыненні да палітыка вядзецца расследаванне па справе аб тэрарызме — у тым ліку за падтрымку забароненай у краіне Курдскай працоўнай партыі.
Каментары