«Значыць, нешта не так з Каардынацыйнай радай». Злітая стэнаграма паказвае, як рэзка Ціханоўская ацэньвала дзейнасць КР

У тэлеграм-канале Рамана Пратасевіча з'явілася стэнаграма сустрэчы Святланы Ціханоўскай з прадстаўнікамі фракцыі «Беларусы» ў Каардынацыйнай радзе. Асноўная дыскусія адбылася з Вадзімам Пракоп'евым.

У дакуменце няма ніякіх пазнак, калі канкрэтна гэта адбылося. Але са зместу размовы вынікае, што пасля выбараў трэцяга складу Каардынацыйнай рады ў маі 2024 года. У той час Ціханоўская праводзіла сустрэчы з кожнай фракцыяй.

Як яна адзначае, гэтыя сустрэчы паказалі, што «ва ўсіх рознае разуменне таго, як будзе арганізавана работа трэцяга складу» і просіць, каб размова ішла менавіта аб Каардынацыйнай радзе.

Адкуль у беларускіх спецслужбаў і ў Пратасевіча дакумент? Хутчэй за ўсё, з тэхнікі арыштаванага каліноўца Васіля Верамейчыка.

Навошта патрэбна Каардынацыйная рада

На пачатку размовы Вадзім Пракоп'еў пацікавіўся ў Ціханоўскай, навошта ёй Каардынацыйная рада.

«Задача Каардынацыйнай рады быць патрэбнай не мне, а быць патрэбнай людзям, беларусам. І я лічу, што адна з асноўных задач Каардынацыйнай рады, каб праз некаторы час вашай працы, трэцяга склікання, у беларусаў быў адказ на пытанне, навошта нам патрэбна Каардынацыйная рада. На жаль, пасля таго, як былі абвешчаны выбары, і гэтыя пытанні паляцелі з усіх бакоў, адказу не знайшлося. Дык вось цяпер трэба, каб ён знайшоўся», — адказала Святлана Ціханоўская.

Пракоп'еў працягнуў наступ: «Я з вашага адказу здагадваюся, што вам асабіста яна не асабліва патрэбная? Вы хацелі б, каб Каардынацыйная рада тлумачыла беларусам, навошта яна ўвогуле створана і навошта яна патрэбна?»

У адказ Ціханоўская заўважала, што такі погляд — уласная інтэрпрэтацыя Пракоп'ева. І дадала:

«Каардынацыйная Рада патрэбна для стабільнасці дэмакратычных сіл. Аднак калі за два скліканні ў людзей усё яшчэ пытанне, навошта патрэбна Каардынацыйная рада, значыць нешта не так з Каардынацыйнай радай. (…)

Выдатныя людзі там сабраныя. Яна не стала структурай, якая ў разуменні беларусаў важная і неабходная. Вось Каардынацыйная рада — людзі і задаюць пытанне, а ў чым каардынацыя».

Пракоп'еў не супакоіўся і паспрабаваў даведацца, навошта менавіта Офісу Ціханоўскай патрэбна Каардынацыйная рада:

«Яна вам увогуле здалася ці яна наадварот перашкода вам?»

«Для мяне Каардынацыйная рада абсалютна не перашкода. (…) Я хачу, каб Каардынацыйная рада стала дапамогай усёй структуры. (…) Для мяне вельмі дзіўнае гэтае пытанне. Я з самага пачатку паўтарала: я хачу, каб у нас была моцная, самастойная Каардынацыйная рада».

Ці магчыма аб'яднаць дыяспару

Пагадзіўшыся з такім меркаваннем, Вадзім Пракоп'еў пацікавіўся ў Ціханоўскай, ці бачыць яна неабходнасць у стварэнні руху, які б аб'яднаў дыяспары.

Ціханоўская адзначыла, што бачыць моц у дыяспары, аднак не зусім разумее, як будзе рэалізоўвацца ідэя аб'яднання беларусаў за мяжою. Па яе назіраннях, «чым далей яны ад'язджаюць, тым больш мы гэтых людзей губляем». У якасці прыкладу Ціханоўская згадала сустрэчу з прадстаўнікамі беларускай дыяспары ў адной з краін, якая яе вельмі дэмаралізавала.

«Я прыязджаю да іх, і яны гавораць: вось, Святлана, у нас тут пашпарты, у нас легалізацыя, у нас тут такія складанасці. Гавару: добра, я тады нешта змагу зрабіць. А што вы зрабілі да майго прыезду? Ну нічога, у нас, ведаеце, смачная кава, смачныя круасаны, нам так добра жывецца. Тыпу, ну прыедзьце, рашыце нашы праблемы».

Ціханоўская запэўніла Пракоп'ева, што яна першая пацісне яму руку, калі яму ўдасца аб'яднаць дыяспару. Той у сваю чаргу стаў расказваць пра сваю ідэю сабраць стадыён і запрашаць прыйсці на яго Ціханоўскую.

На пытанне, навошта яе прысутнасць, Пракоп'еў заўважыў, што арганізатарам патрэбны лайн-ап (папярэдне заяўлены склад удзельнікаў).

«Проста для шоу я ўдзельнічаць не буду. Але калі ў вас ёсць разуменне і вы мне яго пакажаце, як будзеце з гэтымі людзьмі працаваць потым, тады я далучуся. Але мне… для адкрыцця… Вадзіма Пракоп'ева стадыён не патрэбны. (…)

Вы ж у нас чалавек-свята, вы ведаеце, як ладзіць святы. Але нам трэба наладжваць работу гэтых людзей потым», — адказала лідарка дэмакратычных сіл Беларусі.

Колькі ідзе на беларускія медыя

У далейшай размове Пракоп'еў паспрабаваў даведацца лічбы фінансавання беларускіх дэмакратычных медыя. Па яго словах, на іх ідзе сума ў некалькі разоў большая за 5,5 мільёна даляраў, якія атрымлівае расійскі тэлеканал «Дождь». Але ў выніку «і карцінка горшая, і ахоп горшы».

«Сумы пад рукой у вас няма? Таму што я не ведаю яе дакладна», — спытаў Пракоп'еў.

«У мяне яе не тое што пад рукой, але яе ў цэлым няма. Я ніколі не бачыла сумы, якія ідуць на дапамогу. Не павінна мяне тычыцца», — адказала Ціханоўская.

Ці знаходзяцца дэмакратычныя сілы ў крызісе?

У працягу сустрэчы Пракоп'еў пацікавіўся ў Ціханоўскай, ці пагаджаецца яна з меркаваннем экспертаў аб тым, што дэмакратычныя сілы знаходзяцца ў крызісе.

«Крызіс будзе толькі тады, калі не эксперты, а мы самі, беларусы, зразумеем, што мы ў крызісе. (…) Я з гэтым не згодная. (…) Так, менш увагі. Але менш увагі ад каго? Ад беларусаў. То гэта наша з вамі адказнасць.

Чаму адзін пайшоў, людзі выехалі і пачалі жыць сваім жыццём? Замест таго, каб актыўна далей працаваць. Людзі ў турмах, яны нас чакаюць. Яны не чакаюць экспертаў, якія пішуць, што мы ў крызісе. Яны чакаюць нас з вамі. Калі мы прыйдзем іх вызвалім. Дык вось, калі кожны не возьме на сябе адказнасць, выніку ніякага не будзе», — пастаралася давесці сваю пазіцыю Ціханоўская.

• 47
• 0
• 10
• 12
• 0
• 1
• 0
• 1