Прапагандысты анансавалі інтэрв'ю з усімі палякамі, асуджанымі ў Беларусі за шпіянаж
Па Беларускім тэлебачанні паказалі інтэрв’ю з грамадзянiнам Польшчы Томашам Бярозам, якога асудзілі на 14 гадоў калонii за шпіянаж і агентурную дзейнасць. Пры гэтым абяцаюць, што на гэтым спыняцца не будуць і неўзабаве героямі іх прапагандысцкіх матэрыялаў стануць і іншыя палякі, якія знаходзяцца ў беларускіх турмах па падобных абвінавачаннях.
Томаша Бярозу, які жанаты з беларускай і жыў ды займаўся бізнэсам у Кобрыне, затрымалі ў жніўні 2022 года. Падчас інтэрв’ю ён расказаў, што быў затрыманы супрацоўнікамі міліцыі, пасля чаго яго перадалі ў КДБ у Брэсце. У размове з прапагандыстам ён выказаў шкадаванне ў здзейсненым і сказаў, што спадзяецца вярнуцца да сваёй сям’і, якая цяпер жыве ў Польшчы.
Таксама Томаш Бяроза звярнуўся да ўладаў Польшчы з просьбай дапамагчы яму. Ён папрасіў «людзей, якія вырашаюць мой лёс, прыняць усе меры, каб я мог вярнуцца да сваёй жонкі, да сваіх дзяцей і каб гэты кашмар, які пачаўся ў жніўні 2022-га, хутчэй скончыўся».
Завербавалі ж Бярозу польскія спецслужбы нібыта яшчэ ў 2010 годзе, калі ён вучыўся ў Бяла-Падлясцы.
Прапагандысцкае інтэрв’ю з Томашам Бярозам — частка анансаванай серыі, у якой улады будуць паказваюць зняволеных палякаў, якія просяць дапамогі. Якой мэты гэтым яны збіраюцца дасягнуць і ці з'яўляюцца гэтыя інтэрв'ю праявай нейкіх закулісных перамоў, якія вядуцца рэжымам Лукашэнкі з польскім бокам, сказаць пакуль цяжка.
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах25
Каментары