Пашынян заклікаў пазбавіць пасады Каталікоса ўсіх армян, бо ў таго знайшлося дзіця
Прэм’ер-міністр Арменіі Нікол Пашынян заявіў, што Каталікос усіх армян Гарэгін II парушыў абет бясшлюбнасці, які сам прыняў добраахвотна.
Паводле Пашыняна, такія паводзіны каталікоса супярэчыць канонам Армянскай Апостальскай Царквы, таму Гарэгін II не меў права быць не толькі каталікосам, але нават біскупам ці архібіскупам.
Пашынян заклікае Гарэгіна ІІ вызваліць патрыяршыя пакоі і правесці выбары новага каталікоса, маральныя якасці якога будуць правераныя перад абраннем. Ён звярнуўся да вернікаў з заклікам аб’яднацца дзеля гэтага, прытрымліваючыся хрысціянскіх прынцыпаў.
73-гадовы Гарэгін ІІ кіруе Армянскай Апостальскай Царквой больш за чвэрць стагоддзя, з кастрычніка 1999 года. Нядаўна да 25-годдзя сваёй інтранізацыі ён быў узнагароджаны патрыярхам Маскоўскім і ўсяе Русі Кірылам ордэнам РПЦ.
Супрацьстаянне паміж Армянскай Апостальскай Царквой і Ніколам Пашынянам працягваецца з 2020 года, калі пасля няўдалай для Арменіі 44-дзённай вайны за Карабах царкоўны сабор запатрабаваў адстаўкі прэм’ер-міністра. У адказ урад пачаў пераглядаць ролю Царквы ў грамадстве і ўвёў больш строгі кантроль за яе дзейнасцю.
Сітуацыя абвастрылася тыдзень таму пасля інцыдэнту ў манастыры Мармашэн у Шыракскай вобласці. Там узнікла слоўная сварка паміж прыхільнікамі Царквы і прадстаўнікамі ўлады. Канфлікт справакавала заява настаяцеля храма Парэна Петрасяна, які папярэдзіў прыхільнікаў Пашыняна, каб яны не наведвалі манастыр. У адказ адзін з іх арганізаваў публічны візіт, што і прывяло да напружанасці.
Цяпер чытаюць
Хто з палітвязняў выйшаў на свабоду 16 верасня ПОЎНЫ СПІС11
Каментары