Нацыянальны тэатр оперы і балета Беларусі плануе гастролі ў анексаваным Крыме ў жніўні 2025 года, піша «Люстэрка».
Паводле інфармацыі, атрыманай ад некалькіх незалежных крыніц, балетная трупа прадставіць балет «Жызель» у Севастопалі, плануюцца чатыры паказы.
Кіраўніком гастроляў будзе расійскі дырыжор Арцём Макараў, які з 2023 года з'яўляецца галоўным дырыжорам Мінскага опернага тэатра, а з мая 2025 года таксама стаў яго мастацкім кіраўніком. Паралельна Макараў працуе галоўным дырыжорам Маскоўскага дзіцячага музычнага тэатра імя Наталлі Сац.
Калектыў «па большай частцы супраць» паездкі ў Крым, кажа адзін з суразмоўцаў, тэатр цісне на артыстаў, у тым ліку намякаючы на праблемы ў далейшай кар'еры. Тым не менш нямала людзей напісалі адмовы, у прыватнасці ў аркестры.
«Многія штатныя супрацоўнікі адмаўляюцца ехаць, кіраўніцтва збірае музыкаў па іншых калектывах, — пацвярджае другі суразмоўца. — Музыкам гавораць на ўзроўні намесніка дырэктара (ім, як паказана на сайце, працуе Вадзім Мартысевіч), што калі хто не паедзе, возьмуць з боку колькі трэба [музыкаў], і гастролі ўсё роўна адбудуцца».
Адна з крыніц таксама сцвярджае, што артыстаў прымушаюць падпісаць дакумент, што тэатр не нясе адказнасці за іх бяспеку на гастролях, але іншыя не змаглі пацвердзіць або абвергнуць гэтыя звесткі.
Афіцыйна сталічны тэатр пакуль не абвяшчаў пра паездку ў анексаваны Расіяй Крым. Інфармацыі на сайце або ў сацсетках калектыву аб гэтых гастролях пакуль няма.
Нагадаем, як адзначаў у 2023-м у інтэрв'ю дырыжор Іван Касцяхін, пасля 2020 года з трупы балета ў Оперным тэатры звольнілася або было звольнена каля траціны складу.
«У асноўным гэта людзі вопытныя — цяпер яны працуюць у Амерыцы, Італіі, Францыі, Польшчы, краінах Балтыі. Звольненыя ёсць і сярод салістаў, і ў аркестры. Сярод іх вельмі значныя фігуры, якія вызначаюць для ўзроўню спектакляў і статусу тэатра. Былі музыкі, якія сышлі следам за звольненымі ў знак пратэсту».
Цяпер чытаюць
У дакументах па «справе Эпштэйна» знайшлі сляды буйных грашовых пераводаў у Мінск. Зноў усплыло імя Карыны Шуляк35
Каментары
[Зрэдагавана]