Наколькі дакладна можна прадказаць надвор'е на месяц? І чаму дагэтуль не папярэджваюць пра тарнада за дзень?
Дакладнасць прагнозу надвор'я на трое сутак — 96%. А далей?
Дырэктар Інстытута прыродакарыстання НАН Беларусі Сяргей Лысенка расказаў на АНТ, што дакладнасць беларускіх прагнозаў надвор'я з гадамі павялічваецца.
«Для параўнання, калі мы возьмем кароткатэрміновыя прагнозы — прагнозы на трое сутак, — то ў 1990-х гадах апраўданасць такіх прагнозаў была 90%. Цяпер мы маем ужо апраўданасць на ўзроўні 96%. Наш Белгідрамет дае цяпер кароткатэрміновыя прагнозы на сусветным ўзроўні.
А вось далей ужо апраўданасць хутка падае. Дапусцім, на 10 сутак апраўданасць — усяго 50%. Таму, калі хтосьці заяўляе на асобных сайтах, якое надвор'е будзе праз месяц, праз два — гэта не больш чым спекуляцыя».
Але сучасныя мадэлі дагэтуль неідэальныя, калі размова пра прагноз экстрэмальных, небяспечных з'яў надвор'я.
«Рэч у тым, што гэтыя з'явы досыць дробнамаштабныя, і, каб іх улічыць мадэлямі, трэба звышвысокую магутнасць, то бок меншую за 100 метраў. Нават у ЗША, у якіх часта ўзнікае тарнада, своечасовасць прагназавання такога роду з'явы складае ўсяго 20 хвілін. То бок, гэта досыць складаная задача».
Але, адзначае Лысенка, яго інстытут цяпер дапрацоўвае тэхналогіі сярэднетэрміновага прагназавання. Праз год-два беларускія метэаролагі спадзяюцца даваць прагноз надвор'я з дэталёвасцю па кожнай гадзіне на перыяд да 10 сутак.
Што да сёлетняга надвор'я, то такая сітуацыя — прахалодны травень, не вельмі цёплы чэрвень і падвышаная колькасць ападкаў — сустракаецца ў Беларусі прыкладна раз у 10 гадоў. Аналагічнае надвор'е было апошні раз дзесьці ў 2009 годзе.
«Ападкі сталі больш інтэнсіўнымі на 20-30%, а працягласць выпадзення ападкаў скарацілася прыкладна на такую ж велічыню. Гэта значыць ападкаў больш не стала, але яны сталі больш інтэнсіўнымі і выпадаюць за больш кароткі час», — патлумачыў Лысенка.
Цяпер чытаюць
Максім Знак наведаў спектакль «Зэкамерон», пастаўлены па ягонай кнізе, напісанай у СІЗА4
Каментары