У Венгрыі старадаўняя бібліятэка ў абацтве Пананхальма ратуе нацыянальныя культурныя скарбы ад нашэсця жукоў. Гэта абацтва, заснаванае яшчэ ў 996 годзе, з'яўляецца адным з найстарэйшых рэлігійных і культурных цэнтраў краіны і ўваходзіць у спіс Сусветнай спадчыны ЮНЕСКА, піша Euronews.
У бібліятэцы захоўваецца каля 400 000 кніг, і цяпер каля 100 000 з іх здымаюць з паліц, каб пачаць дэзынфекцыю — кнігі заражаныя жуком-шкоднікам, які праядае вокладкі і старонкі. Гэты жук, вядомы як хлебны тачыльшчык, звычайна жыве ў сухіх прадуктах, але яго таксама прыцягваюць клеі, што выкарыстоўваюцца ў кнігах.
Заражэнне было выяўлена падчас звычайнага прыбірання, калі супрацоўнікі заўважылі дзіўны пыл і адтуліны ў кнігах. Паколькі шкода аказалася значнай, было прынята рашэнне апрацаваць усю калекцыю. Кнігі запячатваюць у герметычныя пакеты без кіслароду і пакідаюць у асяроддзі чыстага азоту на шэсць тыдняў, каб знішчыць шкоднікаў.
Сярод найкаштоўнейшых кніг — поўная Біблія XIII стагоддзя і сотні рукапісных выданняў, створаных яшчэ да вынаходніцтва друку. Нягледзячы на тое, што найстарэйшыя экспанаты захоўваюцца асобна, нават частковая шкода калекцыі ўспрымаецца як страта культурнай спадчыны.
Спецыялісты мяркуюць, што актыўнасць жукоў магла ўзрасці з-за змены клімату — у цяплейшым надвор'і яны паспяваюць прайсці некалькі жыццёвых цыклаў за год. Гэта новая пагроза для старажытных кніжных збораў, дзе раней галоўнай праблемай была толькі цвіль.
Кіраўніцтва бібліятэкі падкрэслівае, што паводле правіла святога Бенедыкта, кожная рэч у абацтве — гэта як святы алтарны посуд. І таму яны адчуваюць глыбокую адказнасць за захаванне гэтых кніг для будучых пакаленняў.
Каментары