Беспілотнік, які ўпаў у Мінску, прыляцеў з боку Барысава — шматлікія сведчанні
БПЛА ляцеў да сталіцы Беларусі з паўночнага ўсходу. Людзі пішуць, што беспілотнік назіралі над Магілёўскай вобласцю каля 0:00—01:00 і над Барысавам прыкладна ў 01:30—01:40.
29 ліпеня ў мінскім мікрараёне Дамброўка разбіўся беспілотнік. Ён урэзаўся ў жылы дом, але не выбухнуў, хоць, як сцвярджае Следчы камітэт, ён быў аснашчаны выбуховай прыладай на аснове тратылу. Навіна пра тое, што баявы беспілотнік даляцеў да Мінску, актыўна абмяркоўваецца ў сацыяльных сетках.
З расказаў людзей робіцца ясным маршрут палёту баявой машыны.
Дрон спачатку праляцеў над Магілёўскай вобласцю. Мяркуючы па ўсім, ён заляцеў у яе каля 12 ночы і ляцеў над Магілёўшчынай прыкладна гадзіну.
«У Магілёўскай вобласці ў 12 гадзін ночы прыкладна пралятаў над домам», — піша адзін з каментатараў. Другі пацвярджае, што чуў шум.
«У гадзіну ночы над Магілёўскай вобласцю ляцеў. Я на гп (галасавое паведамленне. — НН) сяброўцы запісала шум», — сцвярджае іншая.
«Так-так. Ноччу. Гук, быццам бы на матацыкле так нехта гнаў ці на мапедзе… Адразу падумала, што падалося, што нешта ў небе. У выніку не падалося», — дзеліцца яшчэ адна відавочца.
А прыкладна а палове на другую гадзіну ночы гук, падобны да гуку мапеда, чулі ўжо жыхары Барысава.
«Сёння ноччу ў 1.30 гэты цуд пралятаў над Барысавам, я нават выйшаў на двор і бачыў, як ён ляцеў у бок Мінска».
Больш інфармацыі прыводзіць жанчына, якая ў момант пралёту знаходзілася ў мясцовай бальніцы:
«Сёння ноччу было два такія гукі перад самай навальніцай. Прыблізна ў гадзіну сорак. Наша бальніца ў Барысаве каля лесу, і дакладна пад вокнамі не можа ехаць мапед. Гук быў адзін раз вельмі моцны хуткасны, другі праз хвілін 7 і менш быў чуваць. У нашай палаце чула не адна я. «Крылаты мапед, ці што?» — так мы падумалі».
Пра дзіўны гук, які ў Барысаве было чуваць у 1.40 ночы, піша яшчэ адна мясцовая жыхарка:
«Жыву ў Барысаве. У 1.40 чула тое ж самае. І моцна спужалася. Пачала пісаць сябрам, ці чулі яны нешта. Тыя сказалі, што так. Але запэўнівалі мяне, што гэта пітбайк ці матацыкл. У выніку расказваю ім сёння, і яны не вераць».
«Я таксама чуў два разы», — пагаджаецца іншы.
«1.40 чула. Барысаў» — пацвярджае час адна жанчына.
«Каля Першай Савецкай таксама быў чуваць» — дадае яшчэ адзін каментатар.
Што тычыцца падзення беспілотніка ў Мінску, то, па словах відавочцаў, яно адбылося «дастаткова ціха», ён не выбухнуў.
«Я жыву ў гэтым доме. Нават чула яго. Дакладней, як машыны пачалі раўці. Сам беспілотнік урэзаўся дастаткова ціха».
«Ён урэзаўся ў дом і ўпаў пасля гэтага. Узрыву не было. Там літаральна пару шыбаў разбіла. Ляжаў проста ў мяне пад падзікам».
«Я каля гэтага месца жыву і я нічога не чуў. Нават не прачнуўся».
Нагадаем, што СК апублікаваў відэазапіс моманту падзення беспілотніка ў Мінску. На абломках паказалі ўкраінскія надпісы.
СК сцвярджае, што ў беспілотніка была баявая частка, запоўненая трацілам і вялікай колькасцю паражальных элементаў.
У паведамленні СК гаворыцца: «На месцы здарэння працавала следча-аператыўная група. Следчымі з прыцягненнем спецыялістаў ГКСЭ і сапёраў праведзены агляд, зафіксавана следчая карціна. Вынятыя фрагменты корпуса і крылаў БПЛА, рухавік, прыборы навігацыі і баявая частка, аснашчаная тратылам і вялікай колькасцю паражальных элементаў у выглядзе металічных шарыкаў», — гаворыцца ў паведамленні СК.
«У выніку здарэння пацярпелых няма, эвакуацыя жыхароў не праводзілася».
На відэа СК бачныя ўкраінскія надпісы, у прыватнасці, лагатып завода Uavionix.
Інцыдэнт адбыўся 29 ліпеня каля 2:00. Беспілотнік, як сцвярджаюць відавочцы, урэзаўся ў дом, пасля чаго ўпаў на прыпаркаваны аўтамабіль і выбухнуў.
На відэа, якое ёсць у рэдакцыі «Люстэрка», можна заўважыць начны двор дома № 72 па вуліцы Матусевіча. У роліку чуваць шум, падобны да гуку мапеда, пасля чаго чуваць моцны выбух. Пасля гэтага на зямлю падаюць абломкі, а побач з прыпаркаванымі аўто ззяюць іскры пад серыю гукаў удараў і выбухаў.
«Міліцыя прыехала толькі праз 25 хвілін, пасля чаго ўсіх разагналі, — распавялі відавочцы. — Усе прачнуліся ад гэтага пранізлівага гуку, ноч атрымалася жахлівай».
У двары гэтага дома знаходзіцца дзіцячы сад № 12.
Пасля публікацый у незалежных медыя адрэагавала і Міністэрства абароны. Яно заявіла, што беспілотнік быў падаўлены сродкамі радыёэлектроннай барацьбы.
«Дзяжурнымі сіламі СПА каля 2 гадзін ночы 29 ліпеня ў паветранай прасторы Рэспублікі Беларусь быў знойдзены і спынены палёт неапазнанай паветранай цэлі — парушальніка парадку выкарыстання паветранай прасторы, ідэнтыфікаванай як БЛА. У выніку ўздзеяння на яго сродкаў радыёэлектроннай барацьбы 02.33 БЛА ўпаў у раёне дома 72 па вул. Матусевіча г. Мінска».
Пацярпелых няма.
Тэарэтычна ўкраінскія беспілотнікі, як і расійскія, могуць збівацца з курсу і залятаць у Беларусь. Але на практыцы раней гэта здаралася пераважна з расійскімі БПЛА пад уздзеяннем украінскіх сістэм радыёэлектроннай барацьбы.
Магчымыя і спланаваныя правакацыі, калі адзін з бакоў выкарыстоўвае беспілотнікі, падробленыя пад чужыя вырабы.
Сапраўднасць абломкаў беспілотніка, відэа якіх апублікаваў Следчы камітэт Беларусі, незалежна праверыць немагчыма, бо на гэты момант няма іншых відэа ці фота з месца падзеі. Магчыма, іх і не будзе. «Люстэрка» паведамляла, што міліцыя ноччу ачапіла месца падзення. А днём праваабаронцы «Вясны» паведамілі, што АМАП праводзіць затрыманні каля дома, дзе беспілотнік упаў.
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе9
Каментары