Мінчук на «Лексусе» таямніча прапаў пад Мінскам. Ніхто не ведае, куды ён дзеўся
Кірыл Шаблінскі перастаў выходзіць на сувязь у панядзелак, 4 жніўня, каля 21:00 у аграгарадку Драчкава Смалявіцкага раёна. Магчыма, яго бачылі ў Плешчаніцах Лагойскага раёна.
Адлегласць ад смалявіцкага Драчкава да лагойскіх Плешчаніц — каля 87 кіламетраў. Валанцёры пошукава-выратавальнана атрада «Анёл» адправіліся на пошукі ў Плешчаніцы — апошняе месца, дзе была заўважана машына Кірыла, разам з якой ён знік.
У сераду каля 30 валанцёраў пошукава-выратавальнага атрада «Анёл» у Плешчаніцах да чатырох гадзін раніцы шукалі 46-гадовага мінчука Кірыла Шаблінскага, які знік разам са сваім аўтамабілем «Lexus»
Камандзір ПВА «Анёл» Сяргей Коўган распавёў Kraj.by:
— Аб знікненні Кірыла Шаблінскага нам паведаміла ягоная жонка. Па яе словах, нічога падобнага з яе мужам не здаралася на працягу дзевяці гадоў шлюбу. 4 жніўня Кірыл на сваім «Lexus» паехаў з Мінска да маці ў Драчкава. Увечары гэтага дня ён паведаміў жонцы па тэлефоне, што на зваротным шляху плануе заехаць па працы да заказчыка.
У 21:00 мужчына перастаў выходзіць на сувязь, яго тэлефон адключыўся і да гэтага часу не ўключаўся. Мы склалі арыенціроўку і прыступілі да пошукаў.
Сяргей Коўган адзначае: апошняе месца, дзе аўтамабіль мінчука трапіў у поле зроку камер відэаназірання — гэта ўезд у гарадскі пасёлак Плешчаніцы Лагойскага раёна.
Групы валанцёраў адправіліся ў Плешчаніцы. Пошукавай аперацыяй там кіраваў Кірыл Голубеў. Раніцай 6 жніўня ён распавёў:
— Першая група прыступіла да пошукаў 5 жніўня прыкладна а 18:30, потым падцягнуліся астатнія нашы валанцёры. Шукалі ўвесь вечар і ўсю ноч. Дадому я вярнуўся сёння а шостай раніцы. Шаблінскага мы не знайшлі, яго аўтамабіль таксама не знойдзены.
Паводле слоў Сяргея Коўгана, у «Lexus» мінчука не было навігатара. Магчыма, ён карыстаўся навігатарам з мабільнага тэлефона, які цяпер не працуе.
Ёсць такія звесткі, што ў адзін з дзён гэтага тыдня яго бачылі на запраўцы ў Мінску.
«Анёлы» просяць паведамляць на нумар: 7733 (для ўсіх аператараў мабільнай сувязі), +375 33 6666-033, +375 29 270-77-33. Або па тэлефоне 102 у бліжэйшы аддзел міліцыі.
Абвясціла вышук і мінская міліцыя.
4 жніўня знаходзіўся ў маці ў Смалявіцкім раёне, пасля чаго каля 21:00 таго ж дня з’ехаў на аўтамабілі Lexus GX470 (рэг. знак 0891 МО-7) у невядомым напрамку і да гэтага часу на сувязь не выходзіць, гаворыцца ў паведамленні.
Прыкметы: на выгляд 45 гадоў, рост 190—195 см, хударлявага целаскладу, вочы блакітныя, валасы цёмна-русыя, носіць бараду.
Адзенне: чорная майка з фіялетавым прынтам, джынсавыя шорты сіняга колеру, красоўкі колеру хакі.
Калі вам што-небудзь вядома пра месцазнаходжанне мужчыны, просяць паведаміць у Савецкі РАУС г. Мінска:
- 8029-255-55-63
- 8017-239-67-76
- 102
Цяпер чытаюць
За мінулы год насельніцтва Беларусі скарацілася яшчэ на 53 тысячы чалавек19
Каментары