Што робяць з беларусамі, якіх арыштавалі, але не паспяваюць асудзіць за пратэсты. Ёсць два шляхі
Абодва не надта прыемныя, але страты ад іх усё ж мінімальныя — адносна таго, якое пакаранне прымянялася раней.
На дварэ ўжо 24 жніўня 2025 года, а значыць, ужо скончыўся пяцігадовы тэрмін прыцягнення да крымінальнай адказнасці за ўдзел у маршах 16 і 23 жніўня 2020. Неўзабаве стане юрыдычна немагчыма пакараць за марш 30 жніўня, пасля 6 верасня і гэтак далей.
Што ж у такой сітуацыі робяць з беларусамі, якіх арыштавалі за ўдзел у пратэстах, адправілі ў СІЗА, але яшчэ не паспелі асудзіць?
«Наша Ніва» даведалася пра два асноўныя шляхі, з якімі сутыкаюцца арыштанты. Адзначым, што самастойна выбіраць паміж гэтымі шляхамі амаль немагчыма — рашэнне прымае следчы.
1. Сядзець да суда — і тады выходзіць на свабоду
У такой сітуацыі людзей трымаюць у СІЗА да вынясення прысуду — нават калі тэрмін ужо скончыўся. Напрыклад, чалавека судзяць за ўдзел у маршы 16 жніўня 2020 года, а суд можа прызначаны на ўмоўнае 1 верасня 2025 года. 16 жніўня 2025 года дэманстранта не адпускаюць, трымаюць да суда.
Аднак усе падобныя выпадкі, пра якія стала вядома «Нашай Ніве», заканчваліся аднолькава. Суд прызнаваў чалавека вінаватым, аднак канстатаваў, што пакаранне не можа быць прызначанае праз тэрміны даўніны, пасля чаго пастанаўляў вызваліць з-пад варты.
Людзі, якія прайшлі такім шляхам, пасля будуць усё адно ўключаныя ў міліцэйскі спіс «экстрэмістаў».
2. Пераходзіць з крыміналкі на адміністратыўку
Некаторым людзям следчыя прапануюць прымяніць артыкул 86 Крыміналькага кодэкса — вызваленне ад крымінальнай адказнасці з прыцягненнем да адміністрацыйнай адказнасці.
Паколькі лукашэнкаўцы лічаць удзел у маршах «менш цяжкім злачынствам», то заканадаўства пакідае такую магчымасць. Дэманстрант павінен прызнаць віну і нейкім чынам загладзіць нанесеную «шкоду» — і тады можа атрымаць не крымінальны, а адміністратыўны пераслед.
Яму прызначаюць штраф (фармальна можа быць ад 5 да 30 базавых, але ва ўсіх вядомых нам выпадках прызначаліся максімальныя 30 базавых) — і адпускаюць з СІЗА дадому.
Тэарэтычна можна і адмовіцца, але сэнсу няма — тады проста давядзецца чакаць суда ў СІЗА.
Ці ўключаюць у спіс экстрэмістаў людзей, каму дазволілі прайсці па гэтым шляху, пакуль невядома.
«Наша Нiва» — бастыён беларушчыны
ПАДТРЫМАЦЬЦяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй33
Каментары
Калі рэдакцыя ладзіцьме пярэбары ў Менск?
Якія тэрміны даўніны за каменты і падпіскі?