Былы прэзідэнт Расіі, цяпер намеснік старшыні Рады бяспекі Дзмітрый Мядзведзеў пагражаў Вялікабрытаніі «забраць каштоўнасці Брытанскай кароны» за перадачу Кіеву даходаў ад выкарыстання актываў РФ, замарожаных у адказ на расійскую агрэсію супраць Украіны, паведамляе Расійская служба Радыё Свабода.
У допісе ў сваім тэлеграм-канале Мядзведзеў таксама пагражае «вярнуць захопленае ў натуральнай форме. Гэта значыць — «украінскай зямлёй» і іншай нерухомай і рухомай маёмасцю, размешчанай на ёй».
У сераду міністр абароны Вялікабрытаніі Джон Хілі падчас візіту ў Кіеў абвясціў пра прадастаўленне Украіне пакета ваеннай дапамогі за кошт даходаў ад замарожаных расійскіх актываў на суму болей за 1 млрд фунтаў стэрлінгаў. Гэта дазволіла паставіць Украіне сотні тысяч артылерыйскіх снарадаў, сотні зенітных ракет, запасных частак для ўзбраення, а таксама заключыць новыя кантракты на абслугоўванне і рамонт абсталявання і ваеннага транспарту.
У Еўропе і краінах «Групы сямі» замарожаныя расійскія актывы ў памеры прыблізна 210—220 млрд еўра, большая частка якіх — дзяржаўныя рэзервы, размешчаныя пераважна на бельгійскай пляцоўцы Euroclear.
Вялікія сумы таксама заблакаваны ў Францыі — 19 млрд еўра. Германія замарозіла каля 210 млн еўра з суверэнных сродкаў. Акрамя рэзерваў Цэнтрабанка Расіі, пад санкцыі трапілі і прыватныя сродкі расійскіх бізнесменаў і кампаній — іх аб’ём складае каля 24 млрд еўра.
Даходы ад кіравання гэтымі актывамі ЕС часткова перадае Украіне. За першае паўгоддзе 2025 года Кіеў атрымаў больш за 10 млрд еўра з даходаў па гэтых сродках.
30 жніўня кіраўнік еўрапейскай дыпламатыі Кая Калас заявіла, што Расія не атрымае назад свае замарожаныя актывы, пакуль не выплаціць рэпарацыі Украіне.
Каментары