Архітэктар назваў тое, што зрабілі ў Нясвіжы, «карным упарадкаваннем»
Перад касцёлам Божага Цела ў Нясвіжы знішчылі ўсе дрэвы і кусты ў скверы, ператварыўшы яго ў голы пляц з шэрай пліткі і з безгустоўнымі лавамі. Тое самае зрабілі ў Лошыцы.
Тэлеграм-канал «Спадчына» звярнуў увагу на змены, якія адбыліся ў гістарычным цэнтры Нясвіжа, назваўшы гэта «карным упарадкаваннем».
Раней на рагу вуліц Гейсіка і Адама Міцкевіча быў сквер з дрэвамі, якія прыгожа абрамлялі выдатную барочную архітэктуру касцёла, але цяпер усё перамянілася.
Змены, відаць, адбыліся летась. У скверыку былі спілаваныя ўсе дрэвы і нават кусты, замест іх з'явіліся тонкія маладыя дубцы. Мяркуючы па фота гэтага года, нельга сказаць, што гэтыя дубцы прыняліся — сярэдзіна лета, а на іх з цяжкасцю можна разгледзець лісце. Калі і выжывуць, то прыстойны выгляд яны набудуць толькі праз дзесяцігоддзі.
Цяпер галоўным акцэнтам плошчы стаў голы пляц з пліткі, на якім сіратліва стаяць безгустоўныя каваныя лавы — ўсё гэтае калгаснае ўпарадкаванне ніяк не стасуецца з узроўнем архітэктуры і значэннем касцёла Божага Цела.
Асобная разынка — металічная клумба ў выглядзе чорнага раяля, чыя дэка ўпрыгожаная аднагадовымі кветкамі. Кветкавы раяль стаіць на пастаменце з чорнага каменю, нагадваючы хутчэй прыбраны пахавальны катафалк.
Такое ўпарадкаванне, калі вынішчаецца ўсё азеляненне і ствараюцца безжыццёвыя прасторы з убогай вулічнай мэбляй, у якіх проста некамфортна знаходзіцца чалавеку, стала сапраўдным пакараннем малых гарадоў і сельскай мясцовасці ў апошняе дзесяцігоддзе.
Густа населеныя і шчыльна забудаваныя буйныя гарады Беларусі парадаксальным чынам становяцца зелянейшыя за райцэнтры і вёскі.
Зрэшты, дурную моду і сюды прыносяць з сабой чыноўнікі, якіх прызначаюць у абласныя цэнтры з правінцыі. Літаральна на днях у Мінску адкрылі пасля рэканструкцыі гаспадарчы двор Лошыцкай сядзібы. У цэнтры замест нармальнага ўпарадкавання — бязмежны пляц з пліткі, пасярод якога гэтак жа сіратліва стаяць тыя самыя каваныя лавы.
Таксістка з Таджыкістана насмерць збіла беларуску ў Польшчы — і спакойна пакінула краіну24
Каментары
папаўняць = пополнять
дополнять = дапаўняць