Заклінальнік Трампа: як брытанскі прэм'ер знайшоў падыход у зносінах з прэзідэнтам ЗША

У апошнія тыдні перад выбарамі 2024 года Дональд Трамп зрабіў перапынак у перадвыбарчай кампаніі, каб павячэраць з прэм'ер-міністрам Вялікабрытаніі Кірам Стармерам, які наведаў Нью-Ёрк для ўдзелу ў Генеральнай Асамблеі ААН.

Паводле слоў высокапастаўленага брытанскага чыноўніка, за вячэрай, якая доўжылася дзве гадзіны, Трамп прыглушыў святло, каб паказаць брытанскаму госцю ззяючы гарызонт Манхэтэна, і выказаў сваю глыбокую любоў да Англіі і Шатландыі.

Як адзначаюць брытанскія чыноўнікі, на амерыканскага прэзідэнта таксама зрабіла ўражанне тое, што Стармер падчас паездкі не стаў сустракацца з ягонай суперніцай, тагачаснай віцэ-прэзідэнткай Камалай Харыс.

З таго часу, як піша WSJ, Стармер умела выкарыстоўвае сімпатыю Трампа да Вялікабрытаніі. За гэты час прэм'ер-міністр давёў да дасканаласці мастацтва абыходжання з прэзідэнтам, які вызначаецца няўстойлівым характарам.

Інструкцыя поспеху

Яго інструкцыя, якую цяпер капіруе ўся Еўропа, простая: будзь ветлівым, не выказвай нязгоду публічна і ў цэлым рабі тое, што ён просіць. І, магчыма, ты таксама атрымаеш свае бонусы.

Пакуль што гэта прыносіць плён. Брытанія змагла вельмі хутка заключыць гандлёвую здзелку з ЗША, дамогшыся больш нізкіх тарыфаў, чым у Еўрасаюза, і абараніўшы інтарэсы сваіх вытворцаў аўтамабіляў і сталі. Акрамя таго, Лондан пераканаў Трампа не адварочвацца ад Украіны.

Напярэдадні дзяржаўнага візіту Трампа ў Лондан амерыканскія тэхналагічныя гіганты, у тым ліку Microsoft і Nvidia, абвясцілі пра інвестыцыі ў брытанскую эканоміку на суму больш за 42 мільярды даляраў.

Гэтыя трансатлантычныя адносіны, адзначае выданне, сталі нечаканым поспехам для Стармера, чые рэйтынгі ўнутры краіны падаюць на фоне эканамічнай стагнацыі і росту нелегальнай іміграцыі.

Павялічыць

Магчымыя пагрозы

Вядома, у такой стратэгіі ёсць і мінусы. Вялікабрытанія пагадзілася на значнае павелічэнне выдаткаў на абарону ў перыяд фінансавых цяжкасцей і прыняла амерыканскія мыты, не ўводзячы мер у адказ.

Застаецца пытанне, што адбудзецца, калі Трамп працягне ціснуць у такіх пытаннях, як свабода слова ці ўмовы далейшай падтрымкі Украіны. Стармер таксама заявіў, што падтрымае прызнанне палесцінскай дзяржаўнасці, крок, які раскрытыкавалі высокапастаўленыя чыноўнікі Трампа.

«Можа надысці момант, калі адсутнасць адпору Трампу стане для Стармера палітычнай праблемай унутры краіны, і ён адчуе неабходнасць пайсці на канфрантацыю», — лічыць Макс Бергман, дырэктар праграмы Еўропы, Расіі і Еўразіі ў Цэнтры стратэгічных і міжнародных даследаванняў.

Павялічыць

Сіла асабістага падыходу

Аднак пакуль прыязныя асабістыя адносіны адыгрываюць ключавую ролю. Па словах чыноўнікаў, Трамп рэгулярна тэлефануе Стармеру, часам без папярэджання і позна ўвечары, і брытанскі прэм'ер заўсёды кідае ўсе справы, каб выслухаць яго.

Трампу падабаецца, што Стармер умее цвёрда адстойваць свае пазіцыі, але пры гэтым ніколі не крытыкуе погляды самога Трампа. Для Стармера, як для былога пракурора, які прывык да сістэмнай працы, падтрымліваць добрыя адносіны з Трампам — гэта важная частка яго прафесійных абавязкаў.

Поспех іх зносін таксама тлумачыцца розніцай у характарах. Эксперты адзначаюць, што Стармер дэманструе брытанскую стрыманасць і ветлівасць, але без паблажлівага ці ўладнага тону. Гэта моцна адрозніваецца ад больш прамалінейнага і рэзкага стылю іншых еўрапейскіх лідараў, напрыклад, прэзідэнта Францыі Эмануэля Макрона.

Стармер не саромеўся ехаць у шатландскі гольф-клуб Трампа, каб гадзінамі слухаць ягоныя размовы пра рамонт курорта. Калі ў жніўні Трамп раптоўна выклікаў Уладзіміра Зяленскага ў Авальны кабінет, Стармер перапыніў свой адпачынак, каб далучыцца да іх у Вашынгтоне. А падчас сустрэчы ў Канадзе ён на вачах у рэпарцёраў кінуўся падымаць дакументы, якія Трамп выпусціў з рук.

Павялічыць

Дыпламатычная гульня, дзе трэба ўвесь час балансаваць паміж уласнымі інтарэсамі і патрабаваннямі партнёра, праяўляецца нават у дробязях. Па словах высокапастаўленага чыноўніка адміністрацыі прэзідэнта ЗША, якога цытуе WSJ, у прыватных размовах Трамп, які вядомы сваімі доўгімі тырадамі супраць ветракоў, любіць жартаваць са Стармерам наконт падтрымкі Вялікабрытаніяй ветравой энергетыкі.

Стыль камунікацыі Стармера з Трампам добра ілюструе паказальная сцэна падчас іх сустрэчы ў Шатландыі.

Седзячы побач з прэзідэнтам у яго гольф-клубе, брытанскі прэм'ер выслухаў скаргі Трампа на тое, што ветракі забіваюць птушак, але не стаў абараняць ветраэнергетычныя праекты ў сваёй краіне. «Мы верым у спалучэнне розных крыніц», — дыпламатычна адказаў ён.

• 5
• 0
• 0
• 3
• 0
• 0
• 0
• 0