Беларускі дызайнер Ягор Ждановіч адзначыўся канцэптуальным перформансам. У цэнтры ўвагі аказаўся самы звычайны камень. Ягор нанёс на яго сваю гравіроўку і прадае за $2000, піша Onliner.by.
Магчыма, проста зараз гэта самы дарагі камень у Беларусі (калі не лічыць каштоўнасцяў). Арт-аб’ект называецца «Нарачанскі валун», ён змешчаны ў прыгожую дызайнерскую шкатулку з аксамітным дном. Увогуле, сказаць пра яго больш і няма чаго: камень як камень.
Нешта падобнае ў розны час рабілі многія сучасныя мастакі і модныя брэнды: можна ўспомніць хоць бы цэглу ад Supreme. Каб выйсці за межы жарту, дызайнер пастараўся і зняў для каменя сапраўдны модны кампан з танцорамі ў белых мантыях.
«Камень — пратэст супраць нормы і аднаразовага спажывання, дзе ідэя памірае ў першай партыі. Ён — сімвал сілы, сталасці і каштоўнасці не масавага, а свядомага выбару», — гаворыцца ў апісанні роліка.
Пра свой эпатажны праект Ягор Ждановіч крыху падрабязней расказаў Onliner.
Чаму менавіта камень? Проста таму, што наўрад ці можна было знайсці прадмет яшчэ больш прымітыўны. Камень, якому трэба было штучна дадаць каштоўнасці, Ягор знайшоў падчас адпачынку з сябрамі на Нарачы паўгода таму, але пазней замяніў на іншы — з той жа лакацыі. Кажа, што другі камень проста выглядаў больш эстэтычна.
— Чаму «Нарачанскі валун»? Па-першае, таму што ён сапраўды з Нарачы, па-другое, таму што Нарач — самае папулярнае возера Беларусі, а я абажаю Беларусь, мне падабаецца распавядаць пра яе з дапамогай нейкіх стыльных, класных рэчаў. Мая мара — каб пра Беларусь гаварылі ва ўсім свеце. І я сам хачу пазіцыянаваць сябе менавіта як беларускага дызайнера.
І першапачаткова камень павінен быў прадавацца за $1000. Цана падскочыла ў той момант, калі Ягор зразумеў, што выдаткаваў на сам праект значна больш. Больш за ўсё грошай пайшло на тое самае відэа, каля 700 рублёў каштавала шкатулка, якую зрабіў майстар з Брэста. Гравіроўка — таксама задавальненне не з танных, мала хто ўвогуле хацеў брацца за падобны заказ. Агульная сума выдаткаў — каля 4500 рублёў. Ці варта было гэта таго?
— Камень ужо сабраў даволі шмат каментарыяў. Нядаўна ролік, відаць, трапіў на аўдыторыю сталага ўзросту: вось там людзі ў асноўным жартуюць, што «беспрацоўнаму чалавеку няма чым заняцца». Сур’ёзна купіць пакуль ніхто не спрабаваў. Напісала адна дзяўчына, я ўжо паспеў узрадавацца, але яна неўзабаве выдаліла дыялог. На самай справе, мне ўжо нават крыху шкада з ім развітвацца, улічваючы той аб’ём працы, які быў праведзены. Але прадаць усё ж такі таксама хачу: хаця б каб даказаць, што гэта магчыма. Пра гэты камень я яшчэ здымаю вялікае відэа на YouTube, калі знойдзецца пакупнік — ён у яго таксама трапіць.
Каментары
А ці расейшчынай псавалі нарачанскія камяні? То-та!