Пасля пачатку вайны з гэтага расійскага серыяла выразалі аднаго з акцёраў.
Калі некалькі дзён таму ў краіне знік доступ да «Укантакце», аказалася, што самымі папулярнымі запытамі ў беларускім гугле ў той дзень была інфармацыя аб прычынах збою, а таксама адзін расійскі серыял. Пра што гэты «Бар «Адзін званок»?
Серыял знялі яшчэ ў 2023 годзе, але выйшаў ён толькі ў кастрычніку 2025-га. Праз цэнзуру праект праляжаў два гады на паліцы. У пачатку поўнамаштабнай вайны шоўранер серыяла Даніла Казлоўскі напісаў антываенны пост. Праекты з артыстам паставілі на паўзу, але пазней той пост быў выдалены, а самога Казлоўскага выкраслілі з чорных спісаў. Для справядлівасці адзначым, што ніякіх публічных пакаянняў ці выступаў у Марыўпалі для гэтага не спатрэбілася.
Але ж памілавалі не ўсіх. Акцёр Максім Вітарган сыграў невялікую ролю ў праекце. Аднак знешнасць і голас Вітаргана, які таксама выступіў супраць вайны, памянялі з дапамогай штучнага інтэлекту, яго імя прыбралі з тытраў. Новыя тэхналогіі ўзбагачаюць цэнзуру.
Дык што гэта за бар?
Ён не мае адраса, простаму чалавеку туды нельга пазваніць. Гэты бар сам вас знойдзе, калі ў вас нехта памёр. Смяшлівы бармен унутры (яго грае Казлоўскі) бясплатна налівае алкаголь і ці то спрабуе разгаварыць, ці то ўгаворвае сыграць у барную гульню.
Паводле яе правілаў, вы атрымліваеце хвіліну на тое, каб пагаварыць з памерлым чалавекам на ваш выбар. Але ж адказу не пачуеце — замест гэтага будуць лічбы на дыску тэлефона, і бармен-Казлоўскі будзе іх вам хутка перакладаць у словы. Калі хвіліна скончылася, трэба плаціць па рахунку. Для гэтага трэба згуляць раўнд у рускую рулетку.
Выжылі? Можна званіць яшчэ, вось толькі куляў у барабане рэвальвера будзе ўжо дзве, і гэтак далей. Далёка не ўсе могуць спыніцца на адным званку — калі пачаў раскалупваць свае раны і хапацца за мінулае, гэта зацягвае.
Выглядае, стваральнікі «Бара» натхняліся японскім анімэ з падобным сюжэтам. Гаворка пра трылер Death Parade 2015 года. Там таксама існаваў пракляты бар, вось толькі прыходзілі ў яго не жывыя людзі, а самі нябожчыкі. Ім у бары ладзілі гульні і па іх выніку высвятлялі, куды пойдзе душа — у рай ці пекла.
Цікава, што цэнзура прапусціла ў серыяле відавочна палітычны жарт. Калі адзін з кліентаў бара тэлефануе адміралу Калчаку, той пытаецца, ці адрадзілася ў Расіі манархія. Суразмоўца адказвае: маўляў, можна і так сказаць.
Бармену ў працы дапамагае падлетак Віця. Некалі ён скарыстаўся паслугамі бара, але не пажадаў плаціць, і яму дазволілі застацца ў бары — зрэшты, працоўныя рукі лішнімі не бываюць. Але ж у Віці «на волі» застаўся бацька, пануры следчы Марозаў, і з цягам часу ён выходзіць на след бара.
Сярод усіх прадуктаў, якія прапусціла расійская цэнзура, «Бар «Адзін званок» — далёка не горшы варыянт. На IMDb серыял мае адзнаку 7,4 з 10.
Тут ёсць шмат загадак. Ці здолее Марозаў знайсці бар? Ці атрымаецца ў кагосьці з кліентаў уратавацца ад аплаты па рахунку? Што за гісторыя ў бармена? І зрэшты, каму належыць сам бар?
Ёсць у серыяле і свая філасофія. Людзі, якія прыходзяць у бар і гінуць там, захраслі ў мінулым — настолькі, каб за хвіліну гутаркі, якой часта і не хапае, рызыкаваць усёй сваёй будучыняй. У звычайным жыцці, вядома, за прыступы віны ці настальгіі не даводзіцца плаціць раўндамі рускай рулеткі, але бяспечнай гэтая справа ўсё роўна не робіцца.
«Наша Нiва» — бастыён беларушчыны
ПАДТРЫМАЦЬ
Каментары
Не прапусціла, а ўпісала.