Прыбытак Ryanair узляцеў на 40% дзякуючы нежаданню еўрапейцаў лятаць у ЗША
Лаўкостар Ryanair паведаміў пра рэзкі рост прыбытку ў першай палове фінансавага года. Авіякампанія тлумачыць выдатныя вынікі зменай турыстычных паводзін еўрапейцаў, якія ўсё часцей выбіраюць мясцовы адпачынак замест падарожжаў праз Атлантыку.
Як піша Financial Times, з красавіка па верасень прыбытак авіякампаніі дасягнуў 2,89 мільярда еўра ў параўнанні з 2,06 мільярда еўра за аналагічны перыяд летась. Агульная выручка вырасла на 13%, склаўшы 9,82 мільярда еўра.
Па словах кіраўніка групы Ryanair Майкла О’Ліры, асноўным рухавіком росту стала «нежаданне» еўрапейцаў праводзіць адпачынак у Злучаных Штатах.
«Трансатлантычныя перавозкі, цэны на якія рэзка растуць, былі вельмі абмежаваныя гэтым летам. Усё больш сем’яў застаюцца дома і праводзяць адпачынак у Еўропе, асабліва ў Міжземнамор’і», — адзначыў О’Ліры.
Дзякуючы росту попыту і больш ранняй, чым чакалася, пастаўцы некаторых самалётаў Boeing 737 Max 8, кампанія Ryanair павялічыла свой гадавы прагноз пасажырапатоку з 206 мільёнаў да 207 мільёнаў чалавек. Новыя самалёты дазволяць лаўкостару дадаць магутнасці ў зімовы перыяд, у тым ліку на Каляды і Новы год.
Паводле слоў О'Ліры, кампанія таксама спадзяецца атрымаць выгаду ад падзення цэн на нафту і ваганняў курсу даляра ЗША. Яна застрахавала кошт паліва на наступны год па цане ніжэй за 67 даляраў за барэль, у параўнанні з 76 далярамі, якія яна плаціць у гэтым годзе. Гэта дазволіць зэканоміць каля 650 мільёнаў еўра на выдатках на паліва.
Аднак О’Ліры падкрэсліў, што гэтыя сродкі будуць выкарыстаны не для неадкладнага зніжэння цэн на квіткі, а для папаўнення грашовых рэзерваў на выпадак наступнага глабальнага шоку (напрыклад, новай пандэміі або эканамічнага спаду).
Дзякуючы пастаўкам новых самалётаў і моцнаму попыту, О’Ліры ўпэўнены, што ў наступныя восем гадоў авіякампанія павялічыць гадавы пасажырапаток да 300 мільёнаў чалавек.
Каментары