78‑гадовы гісторык Васіль Кушнер пайшоў з жыцця пасля працяглай хваробы.
Памёр Васіль Кушнер, заснавальнік і першы галоўны рэдактар «Беларускага гістарычнага часопіса».
78‑гадовы гісторык пайшоў з жыцця 15 лістапада 2025 года пасля працяглай хваробы.
Ён 18 гадоў (з 1993 па 2011) быў галоўным рэдактарам «Беларускага гістарычнага часопіса» — галоўнага навуковага часопіса краіны па гістарычным профілі.
Васіль Кушнер нарадзіўся ў вёсцы Малыя Жухавічы (цяпер Карэліцкі раён Гродзенскай вобласці). Пасля заканчэння сярэдняй школы некаторы час працаваў настаўнікам фізкультуры ў Аюцавіцкай васьмігадовай школе (Карэліцкі раён). У 1971 годзе скончыў гістарычны факультэт Беларускага дзяржаўнага ўніверсітэта.
Пасля службы ў арміі (у 1973) паступіў у аспірантуру Мінскага дзяржаўнага педагагічнага інстытута. У 1977‑м абараніў кандыдацкую дысертацыю на тэму «Ваенна-патрыятычнае выхаванне і падрыхтоўка працоўных Беларусі да абароны Радзімы (1921‑1925 гг.)».
З 1978 па 1980 працаваў старшым выкладчыкам гісторыі СССР і саветнікам дэкана інстытута імя Хасэ Марці (горад Камагуэй, Куба). У кастрычніку 1980‑га вярнуўся ў Мінск. Працаваў старшым выкладчыкам кафедры гісторыі КПСС Мінскага педінстытута, потым (з 1982 года) — дацэнтам.
Ён актыўна выступаў на шматлікіх навуковых канферэнцыях, з’яўляўся старшынём Савета маладых вучоных інстытута.
У 1988 перайшоў працаваць у Міністэрства народнай адукацыі БССР, дзе быў да 1992. Спачатку быў начальнікам аддзела выкладання грамадскіх навук Галоўнага ўпраўлення вышэйшай адукацыі, потым — галоўным інспектарам Упраўлення вышэйшых навучальных устаноў і педагагічнай адукацыі.
У канцы 1990‑х Кушнер прыняў актыўны ўдзел у праекце «Славутыя імёны Бацькаўшчыны».
Быў адным з навуковых кансультантаў, а таксама аўтарам артыкулаў у «Энцыклапедыі гісторыі Беларусі» у 6 тамах (1994—2003) і «Беларускай энцыклапедыі» у 18 тамах (1996—2004).
У 2005 годзе выйшлі з друку вучэбныя дапаможнікі, якія ён дапамагаў рыхтаваць — «Гісторыя Беларусі: у кантэксце сусветных цывілізацый» і «Вялікая Айчынная вайна савецкага народа: у кантэксце Другой сусветнай вайны».
Меў больш за 200 публікацый на беларускай, польскай, іспанскай і іншых мовах.
Кушнер працягваў працаваць і выкладчыкам. З 1988 па 2003 быў дацэнтам кафедры гісторыі Беларускага дзяржаўнага педагагічнага ўніверсітэта імя Максіма Танка, з 2003 па 2008 — дацэнтам кафедры эканамічнай гісторыі Беларускага дзяржаўнага эканамічнага ўніверсітэта.
Каментары