Вызвалілі палітзняволеную маці чатырох дзяцей. Яе мужу прысудзілі 24 гады калоніі
У студзені 2024 года ў Драгічынскім раёне за дапамогу Украіне КДБ затрымаў адразу 12 чалавек. Некаторых бралі сем'ямі. Сярод іх былі сужэнцы Яўген і Лідзія Грук. 22 лістапада Беларусь вярнула Украіне 31 украінца, у тым ліку і 30‑гадовую Лідзію, асуджаную за «агентурную дзейнасць».
У прапагандысцкім фільме беларускага дзяржаўнага канала АНТ сцвярджалася, што Лідзія з мужам Яўгенам фатаграфавала памежныя аб'екты. Сямейнай пары, у якой чацвёра непаўналетніх дзяцей, выставілі абвінавачанне ў «тэрарызме».
У каментары «Суспільному» жанчына пасля вяртання ва Украіну паведаміла, што абвінавачанне ў «тэрарызме» пазней перакваліфікавалі ў «агентурную дзейнасць». Па гэтым абвінавачанні ёй прысудзілі 4 гады зняволення.
Яна таксама заявіла, што яе муж дапамагаў украінцам.
«Ніякіх дзеянняў я не рабіла (гаворка ідзе пра абвінавачанне ў «тэрарызме» — Рэд.). Я ведала, што мой муж дапамагае ўкраінцам, што ён кантактуе з імі. Я ведала, што ён на баку Украіны», — сказала Лідзія журналістам пасля вызвалення.
Яна дадала, што яе мужу прысудзілі 24 гады калоніі ўзмоцненага рэжыму. Дзеці (два сыны і дзве дачкі) цяпер знаходзяцца ў свякрухі ў Беларусі.
Самай малодшай дачцэ падчас яе затрымання было ўсяго 7 месяцаў. Украінка хоча забраць дзяцей да сябе і спадзяецца на дапамогу з боку маці мужа.
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары
Зараз будзем ведаць, як карацелі жадаюць, каб іх затрымлівалі - адразу радзінамі. Прынялі, запісалі
Каб маці мужа магла ёй дапамагаць з дзецьмі, маці трэба эміграваць ва Украіну. З беларускім пашпартам і ўсімі мінусамі ўладальніка беларускага пашпарта ва Украіне (забарона на банкаўскія карткі і іншыя праблемы). Без карткі не атрымаеш пенсію (калі яна пенсіянерка). Па-другое, гэта азначае везці ўнукаў і пад абстрэлы.
І па-трэцяе, гэта азначае кінуць свайго сына, якому прысудзілі 24 гады калоніі ўзмоцненага рэжыму, аднаго, без перадач. На ўсе гэтыя доўгія гады.