Алкаголь, наркотыкі, угоны… Забавы прыяцеляў скончыліся крымінальнай справай
У кастрычніку ў Хоцімску з розніцай у адзін дзень адбыліся два ўгоны транспартных сродкаў. Спачатку знік Mercedes-Benz 208 D, прыпаркаваны каля жылога дома, затым — «ВАЗ 21053».
Абодва выпадкі аб’ядноўвала тое, што дзверы аўтамабіляў былі не зачыненыя, а ў замку запальвання знаходзіўся ключ. Пасля ўгонаў машыны ў тэхнічна спраўным стане былі знойдзеныя на вуліцах вёсак Хоцімскага раёна. Падчас аглядаў месцаў здарэння і саміх аўтамабіляў следча-аператыўнай групай былі канфіскаваныя розныя сляды, у тым ліку пахавыя, паведамляе Дзяржкамітэт судовых экспертыз.
Высветлілася, што да ўгонаў могуць быць датычныя двое раней судзімых мясцовых жыхароў ва ўзросце 19 і 27 гадоў. Іх адзенне і біялагічныя ўзоры былі накіраваныя на судовыя экспертызы.
Паводле вынікаў трасалагічнай экспертызы, праведзенай у Касцюковіцкім міжраённым аддзеле Дзяржаўнага камітэта судовых экспертыз, устаноўлена, што след на шкле ВАЗ мог быць пакінуты курткай 19‑гадовага фігуранта. Вынікі адаралагічнай экспертызы, праведзенай у цэнтральным апараце Дзяржаўнага камітэта судовых экспертыз, паказалі, што пахавы след, зняты з пасажырскага сядзення «ВАЗ», таксама паходзіць ад малодшага фігуранта.
У абодвух выпадках пахавыя сляды, знятыя з руля і з сядзенняў, паходзяць ад згаданага 27‑гадовага грамадзяніна. Следчыя ўзбудзілі ў дачыненні да іх крымінальную справу.
Устаноўлена, што ў момант угону прыяцелі знаходзіліся ў нецвярозым стане, а няўдалы кіроўца не мае права кіравання транспартным сродкам. Аўтамабілі яны бралі, каб проста пакатацца.
Акрамя таго, старэйшага з фігурантаў чакала яшчэ адна няўдача. У яго доме на гарышчы супрацоўнікі міліцыі выявілі падазроныя высушаныя расліны. Паводле вынікаў судовай экспертызы ўстаноўлена, што гэта расліннае рэчыва з’яўляецца небяспечным наркатычным сродкам, не выкарыстоўваемым у медыцынскіх мэтах, — марыхуанай, масай адзін кілаграм.
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары