Маладая рысь трапіла ў капкан у Бабруйскім раёне, потым давялося рабіць аперацыю
Нечаканым вынікам завяршылася паляванне ў паляўнічых тэрыторыях Бабруйскага раёна ў нядзелю. У вяровачны капкан, усталяваны для лоўлі куніцы, трапіла рысь, піша komkur.info.
Як паведаміў начальнік Бабруйскай гарраённай інспекцыі прыродных рэсурсаў і аховы навакольнага асяроддзя Анатоль Грыб, усё адбылося днём у раёне вёскі Мальева.
— У капкан трапіла яшчэ маладое рысяня. Восем месяцаў. Дзяўчынка.
Паляўнічы паведаміў пра здарэнне ў Бабруйскую міжраённую інспекцыю аховы расліннага і жывёльнага свету. Такі парадак прадугледжаны правіламі палявання на дзікіх жывёл. Прадстаўнікі інспекцыі і спецыялісты па дзікай фаўне выехалі на месца. У іх прысутнасці жывёлу вызвалілі з капкана, пасадзілі ў клетку і даставілі ў ветэрынарную клініку да бабруйскага Айбаліта — Рыгора Белягова.
Дапамога ветэрынара сапраўды спатрэбілася. У рысяняці дыягнаставалі пералом правай пярэдняй лапы — наступствы трапляння ў капкан. У панядзелак зверу вагой 10 кілаграмаў правялі аперацыю.
— Аперацыя прайшла паспяхова, пад назіраннем жывёла правядзе два—тры дні, — паведаміў Рыгор.
Як адзначыў Анатоль Грыб, пасля заканчэння ветэрынарнага назірання «кацінага» змесцяць у заапарк гарадскога пасёлка Акцябрскі Гомельскай вобласці.
Выпускаць жывёлу ў натуральнае асяроддзе, лічыць суразмоўца, значыць падвергнуць небяспецы жыццё як звера, так і людзей:
— Рысь паспее прывыкнуць да чалавека і будзе без страху заходзіць у населеныя пункты.
Эколагі разглядалі і варыянт размяшчэння звера ў Магілёўскім заасадзе, аднак там, як паведаміў Анатоль Грыб, аказаліся не гатовыя прыняць дзікага жыхара бабруйскіх лясоў.
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою14
Каментары