«Люблю, калі беларусы беларусяцца»: у сацсетках жартуюць з надвор’я і абмяркоўваюць праблемы
Бацькі спрачаюцца, ці нармальна гэта — прымушаць школьнікаў чысціць ад снегу тэрыторыю вакол школы, а спявак Аляксей Хлястоў, які цяпер працуе таксістам, нягледзячы на завіруху, выйшаў на маршрут. Сабралі рэакцыю беларусаў на цыклон Улі.
У Threads вірусным стаў допіс Веранікі са сталіцы. Яна апублікавала відэа, як мужчына каля вакзала спрытна махае шуфлем:
«Героі не ў кіно, а побач! Малады хлопец, які забраў шуфель у жанчыны-дворніка і пачаў расчышчаць снег у самым цэнтры Мінска — ведай, ты мой герой. Гэта так па-мужчынску».
За 7 гадзін допіс сабраў 17 тысяч падабаек. Людзі ў захапленні: «Люблю, калі беларусы беларусяцца», «У ахапак і ў ЗАГС! Такія на дарозе не валяюцца». А СММшчык піваварні-рэстарана «Сябры» прапанаваў герою відэа зайсці да іх і паабяцаў пачаставаць таго абедам.
Папулярным стала і відэа, у якім невялікі сабака, якога практычна не відаць у снезе, спрабуе ісці за гаспадаром. «Усе беларусы сёння як гэты джэк-расэл-тэр'ер», — падпісала свой ролік дзяўчына.
Шмат актыўных дыскусій узнікла наконт таго, ці варта было сёння адпраўляць дзяцей у школы. Меркаванні падзяліліся: пакуль адны пішуць аргументы з серыі «Мы ў любое надвор’е хадзілі ў школу — і нічога», іншыя лічаць, што такія подзвігі непатрэбныя.
Напрыклад, вірусіцца відэа, у якім школьнік ледзь-ледзь цягнецца праз вялікія сумёты. «Ну цяпер і гэтае пакаленне, калі вырасце, будзе расказваць дзецям як па сумётах па пояс дабіраліся да школы», — жартуюць каментатары.
Некаторыя бацькі здзіўляліся паведамленням ад школ. Адзін з татаў падзяліўся скрыншотам:
«Заўтра хлопчыкі прыходзяць у гімназію а 8.00. Будзем прыбіраць снег. Пракантралюйце, калі ласка, каб дзеці загадзя выйшлі з дому, каб прыйсці своечасова».
Сутнасць гэтай дыскусіі лепш за ўсё перадаюць два найбольш упадабаныя каментары: «І што дрэннага ў тым, што дзяцей будуць прывучаць да працы? Відавочна ж, што не праспект Незалежнасці іх гоняць чысціць. Пасільныя заняткі на свежым паветры. Нават вясёлыя. Ці вы не былі дзецьмі?» супраць «Маё дзіця — не рабочая сіла. Камунальныя пытанні павінны вырашаць людзі, якія за гэта атрымліваюць грошы. У школу дзіця ходзіць атрымліваць адукацыю. Гэта не «заняткі на свежым паветры», гэта экстрэмальныя пагодныя ўмовы».
Яшчэ адна мама з Мінска падзялілася: «Чырвоны ўзровень небяспекі. Наша класная піша, што 9 студзеня нашым пяцікласнікам трэба наведаць музей Вялікай Айчыннай вайны».
У каментарах да гэтага допісу іншая жанчына расказала: «А ў нас у садку выхавацелек кіраўніцтва зверху прымусіла вывесці дзяцей на двор у такую завіруху і зрабіць фатаграфіі, як ім весела гуляць у снезе! Як яны, блін, вольны час на вуліцы бавяць!».
Не абышлося і без канфліктаў. Побач са сталічнай школай № 68 знаходзіцца прыватны сектар. Жыхары дамоў вырашылі пачысціць дарогу побач са сваімі дамамі — бо быў моцны снегапад плюс праехаў трактар, які закапаў машыны.
Але дырэктарцы школы гэта не спадабалася. Спрэчка была праз тое, куды трэба зграбаць снег. У субцітрах тлумачыцца, нібыта дырэктарка патрабавала, каб людзі граблі снег у свае двары, а не на зялёную зону школы.
Шмат беларусаў у Threads хвалюецца за лёс бадзяжных жывёл. Нехта заклікае кожную гадзіну выходзіць на двор і глядзець, ці не трэба нейкага коціка запусціць у пад’езд. Іншыя прапаноўваюць неабыякавым людзям браць да сябе ў кватэру жывёл з вуліцы — хаця б на нейкі час.
Самыя вынаходлівыя беларусы ўжо знайшлі варыянт падзарабіць: мінчанка прадэманстравала візітоўкі, дзе незнаёмец прапаноўвае пачысціць снег за 5 хвілін. Ёсць прыпіска: «знаходжуся на паркоўцы».
Іншая беларуска абураецца цэнамі таксі. Два кіламетры «Яндэкс» ёй прапаноўваў праехаць коштам ад 10,3 да 11,4 рублі.
Дарэчы, працягваючы тэму таксі: спявак-таксіст Аляксей Хлястоў паказаў, як адкопвае сваю машыну. «Я ў шапцы, усё добра, не хвалюйцеся!» — супакоіў ён падпісчыкаў. А пасля распавёў, што паўтара кіламетра едзе ажно 20 хвілін.
У тыктоку ж захапляюцца беларусамі, якія ў дзень, калі абвешчаны чырвоны ўзровень небяспекі, вырашылі выбіць дываны на снезе. Іх не спыніла нават тое, што шалёны вецер знёс адзін з дываноў!
Людзі жартуюць: «А што рабіць? Традыцыі — гэта святое», Трэба паспець, пакуль ляжыць снег — гэта ў нас рэдкая з'ява зараз», «Нам снег толькі для гэтага і патрэбны!».
А беларуска Аксана выклала відэа, як расчышчае снег, і падпісала: «Адчуваю, што год беларускай жанчыны неяк звязаны з годам каня, але ніяк не магу зразумець як».
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ23
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3030
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»30
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Каментары