Трамп абяцае падтрымку пратэстоўцам у Іране. Але ці ёсць у яго дастатковыя сілы?

Дональд Трамп ужо перакінуў значную частку войскаў з Блізкага Усходу для блакады Венесуэлы, у Кангрэсе ўзнікае супраціў ваенным аперацыям за мяжой, а краіны Персідскага заліва не гатовыя падтрымліваць ЗША.

У мінулым годзе Трамп перанакіраваў авіяносец USS Ford і шэраг іншых караблёў з Блізкага Усходу ў Карыбскае мора, дзе яны застаюцца і цяпер. Авіяносцы ж USS Vinson і USS Nimitz, якія раней падтрымлівалі ўдары Ізраіля па Іране ў чэрвені 2025 года, даўно пакінулі рэгіён. Сур’ёзных перакіданняў войскаў ці рэсурсаў не плануецца.

Сістэмы СПА Patriot, што перамяшчаліся на Блізкі Усход з Паўднёвай Карэі, вярнуліся на пастаяннае месца дыслакацыі і там застаюцца. Пры гэтым ЗША ўжо выдаткавалі шмат боепрыпасаў у Чырвоным моры, Іране і Венесуэле, і іх недахоп можа стаць праблемай, калі прыйдзецца доўга абараняць войскі ад іранскіх ракет.

Іран мае вялікі арсенал ракет, у ЗША ж на авіябазе ў Катары знаходзіцца каля 10 тысяч вайскоўцаў, а таксама меншыя групоўкі ў Іраку, Сірыі і Іарданіі. Калі амерыканцы пачнуць бамбіць Іран, а той адкажа, запас ракет-перахопнікаў можа хутка скончыцца, папярэджваюць былыя супрацоўнікі Пентагона.

У Вашынгтоне не раскрываюць канкрэтных планаў ваенных дзеянняў, але шанцы на атаку лічацца вышэйшымі за яе адсутнасць. Трамп слухае розныя меркаванні, але ў канчатковым выніку прымае тое рашэнне, якое лічыць найлепшым.

Але магчымасці дзеянняў абмяжоўвае і апазіцыя ў Кангрэсе, і краіны Блізкага Усходу. Саудаўская Аравія, Аман і Катар не жадаюць ваеннай аперацыі, сцвярджаючы, што гэта выкліча турбуленцыю на нафтапрадуктавых рынках і нашкодзіць эканоміцы ЗША. Саудаўскія чыноўнікі таксама паабяцалі, што не дапусцяць выкарыстання сваёй паветранай прасторы для ўдараў па Іране.

Нават прыхільнікі Трампа ў Кангрэсе выступаюць супраць уводу войскаў. Яны падтрымліваюць санкцыі і эканамічны ціск, але не прамое ўмяшанне.

Амерыканцы могуць не ствараць пастаянную вайсковую прысутнасць у рэгіёне, а перакідаць войскі і авіяцыю для абмежаваных удараў, як гэта было ў чэрвені 2025‑га пры бамбаванні іранскіх ядзерных аб’ектаў. Калі дыпламатыя не спрацуе, магчымыя таксама кібератакі.

У выпадку авіяўдараў галоўнымі цэлямі будуць «цэнтры рэжыму», камандныя пункты, вайсковыя аб’екты і важныя лініі і сродкі сувязі. Па словах адстаўнога амерыканскага адмірала Джона Мілера, вялікага нарастання сілы ў Персідскім заліве не будзе — аперацыі будуць абмежаваныя або з блізкіх да Ірана базаў, або глабальна з тэрыторыі ЗША.

• 0
• 0
• 0
• 1
• 1
• 1
• 0
• 0