У Нарвегіі назвалі «ганьбай» перадачу Трампу Нобелеўскага медаля міру
Крытыку выклікаў учынак лідаркі венесуэльскай апазіцыі Марыі Карыны Мачада, якая аддала свой Нобелеўскі медаль міру прэзідэнту ЗША. У Осла спяшаліся запэўніць, што гэта не азначае, што Дональд Трамп цяпер — лаўрэат прэміі, паведамляе DW Belarus.
«Пасля абвяшчэння аб Нобелеўскай прэміі яе нельга адклікаць, падзяліць або перадаць іншым. Гэта рашэнне канчатковае і дзейнічае вечна. Медаль можа змяніць уладальніка, але званне лаўрэата Нобелеўскай прэміі міру — не», — заявілі ў Нобелеўскім цэнтры міру ў Осла. Гэта музей, прысвечаны Нобелеўскай прэміі міру.
Нарвежскі таблоід Verdens Gang напісаў, што Трамп «не стане лаўрэатам Нобелеўскай прэміі міру, нават калі будзе кожны дзень хадзіць з залатым медалём на шыі».
«Гэта поўнае невыкананне павагі да ўзнагароды з яе боку. І гэта бессэнсоўны ўчынак, бо ўзнагароду нельга проста так перадаць», — заявіла прафесарка Універсітэта Осла, палітолаг Янне Хааланд Матлары. Раней яна працавала ў МЗС Нарвегіі.
Нарвежскі палітолаг Бенедык Бул назваў учынак Мачада «ўражальным, сумным і адкрыта прыніжальным».
«Гэта неверагодна ганебна і наносіць шкоду адной з самых вядомых і важных сусветных прэмій. Прысужджаць прэмію цяпер настолькі палітызавана і патэнцыйна небяспечна, што гэта лёгка можа легітымізаваць стварэнне антыпрэміі міру. Неверагодна, што яна сапраўды аддала прэмію Трампу», — напісаў у Facebook былы мэр Осла Райманд Ёхансэн.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты9
Каментары