Трамп заявіў, што больш не абавязаны думаць пра мір, бо яму не ўручылі Нобелеўскую прэмію міру
Прэзідэнт ЗША Дональд Трамп у лісце прэм’ер-міністру Нарвегіі Ёнасу Гару Сцёрэ рэзка выказаўся пра Еўропу і Данію і зноў узняў тэму Грэнландыі.
«Я больш не адчуваю сябе абавязаным думаць выключна пра мір, хоць ён заўсёды будзе мець першаснае значэнне. Замест гэтага я цяпер магу думаць пра тое, што добра і дарэчы для Злучаных Штатаў Амерыкі», — напісаў Трамп.
У лісце прэзідэнт ЗША наўпрост звязвае сваю пазіцыю з тым, што не атрымаў Нобелеўскую прэмію міру.
«Ваша краіна вырашыла не прысуджаць мне Нобелеўскую прэмію міру за тое, што я завяршыў восем і больш войнаў», — напісаў ён Сцёрэ.
Асобны блок ліста прысвечаны Грэнландыі. На думку Трампа, Данія не здольная абараніць востраў «ні ад Расіі, ні ад Кітая».
«Ды і чаму ў іх наогул ёсць права ўласнасці на яе? Няма ніякіх пісьмовых дакументаў — толькі той факт, што там сотні гадоў таму высадзілася лодка. Але і ў нас таксама былі лодкі, якія там высаджваліся», — дадаў Трамп.
У канцы ліста прэзідэнт ЗША паўтарыў сваю пагрозу і адзначыў, што свет не будзе ў бяспецы да таго часу, пакуль ЗША не атрымаюць «поўны і татальны кантроль над Грэнландыяй».
Цяпер чытаюць
Арыштаваны 75‑гадовы Зміцер Санько — ветэран-выдавец3
Каментары