«Ацяпленне вярнулі, а праз некалькі гадзін трубы лопнулі». Што адбываецца з радыятарамі ў Сухараве
Аварыйную сітуацыю, якая пакінула без цяпла пяць раёнаў сталіцы, ліквідавалі, але заявы жыхароў у дыспетчарскія службы ЖКГ працягваюць паступаць да гэтага часу. Учора чарговы прарыў адбыўся ў мікрараёне Сухарава, піша Onliner.by.
Ацяпленне ў доме па вуліцы Лабанка, 108, пасля вялікай аварыі вярнулі ўчора прыкладна а трэцяй гадзіне дня, але кватэры нават не паспелі прагрэцца. Ужо праз некалькі гадзін, а 19:30, не вытрымаў нагрузкі радыятар у другім пад’ездзе.
— Радыятар з кіпячай вадой у пад’ездзе лопнуў. Бачнасці ад густога пару не было на ўсе 9 паверхаў. Гарачай вады на першым паверсе — па шчыкалатку. Нават дыхаць цяжка было, столькі вільгаці ў паветры. Мы хутка выбеглі, сфатаграфавалі ўсё гэта і забеглі назад у кватэру, каб пара не трапіла ў жыллё, — распавяла жыхарка дома Яна. — Кандэнсат на сценах збіраўся так хутка, што ў тамбуры на трэцім паверсе ўтварылася лужына.
Ваду перакрывалі супрацоўнікі МНС. Дабіцца ЖЭСа ўчора Яне так і не ўдалося, кажа, што на лініі «чарга была з 100 чалавек». У сям’і аднагадовае дзіця, таму мінчане часова паехалі з халоднай кватэры да сваякоў. Аднак бацькі Яны засталіся ў жыллі.
— Усю ноч радыятары шумелі — з сістэмы, відаць, злівалі ваду. Зараз ужо амаль абед, а ў нас са ўчорашняга вечара няма ні цяпла, ні гарачай вады. Тэмпература ў кватэры цяпер менш за 16 градусаў, — дадае мінчанка. — Рэчы не можам ні памыць, ні высушыць ужо трэці дзень.
Выявілася, што без ацяплення і гарачай вады ўчора засталіся не толькі дом №108, але і №110 (у прынцыпе гэта адзін будынак, хоць і падзелены на два адрасы). Там трубы лопнулі яшчэ раней, і МНС дзяжурыла там ужо з пяці гадзін вечара, распавялі жыхары суседніх пад’ездаў.
— Ацяпленне ў дом вернецца сёння найбліжэйшым часам. Цяпер завяршаюцца работы ў доме №17 і доме №60. Потым ідуць на дом №108. Дакладны час сказаць не магу. Спецыялісты працуюць і ўначы, і без абеду, — пракаментавалі сітуацыю ў дыспетчарскай службе ЖЭС №114, у вядзенні якой абслугоўванне абодвух дамоў. — Жыхарам трэба патрываць і пачакаць.
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома12
Каментары