КДБ пачаў кар’еру Кардаш, падсунуўшы яе ў Мінску 55‑гадоваму гуру ўкраінскай журналістыкі
«Ёй 25, яму 55. І ён папаўся — кажуць, не мог адвесці вачэй!»
Маладая беларуская журналістка Іна Кардаш змагла не проста зрабіць кар’еру ва Украіне, але і атрымаць доступ да дзяржаўных сакрэтаў праз асабістыя стасункі з уплывовым кіраўніком аднаго з вядучых інфармагенцтваў краіны. ТСН расказала шлях Іны Кардаш па ўкраінскіх калідорах улады.
Старт яе кар’еры ва Украіне даў 55‑гадовы гуру ўкраінскай журналістыкі, рэдактар агенцтва, імя якога ўкраінскія журналісты не называюць. Але можна лёгка здагадацца, што гэта быў кіраўнік інфармацыйнага агенцтва «Інтэрфакс-Украіна» Аляксандр Мартыненка.
Іх пазнаёмілі ў 2016 годзе ў Мінску, калі адбывалася пасяджэнне трохбаковай кантактнай групы. Там былы прэзідэнт Леанід Кучма сустракаўся з расіянамі пры пасярэдніцтве еўрапейцаў. Менавіта там Іну Кардаш, маладую беларускую журналістку, пазнаёмілі з кіраўніком вядучага інфармацыйнага агенцтва Украіны.
«Ёй 25, яму 55. І ён папаўся — кажуць, не мог адвесці вачэй! Ды Кардаш ужо тады актыўная агентка КДБ — Камітэта дзяржаўнай бяспекі Беларусі», — распавядае канал.
Па легендзе, яна апазіцыйная журналістка, а таму бясстрашна супрацоўнічае з украінскімі медыя, распавядае пра жыццё ў Мінску. У 2020 годзе яна асвятляла маштабныя пратэсты супраць Лукашэнкі.
У рэшце рэшт Іна перабіраецца ва Украіну, бо, як яна кажа, ёй пагражае небяспека на радзіме. І яна тэлефануе сваёй сяброўцы і клапатліваму кіраўніку ўплывовага інфармацыйнага агенцтва.
Кар'ера Іны Кардаш рэзка пайшла ўгору ў інфармацыйным агенцтве. Дзяўчына прыязджае з-за мяжы, уладкоўваецца на працу журналісткай у краіне, мовай якой не валодае.
І, нягледзячы на гэта, практычна адразу атрымлівае ўласнага кіроўцу, жыве ў асобным доме, і самае галоўнае, з агульнай рэдакцыі, дзе сядзяць усе журналісты, перабіраецца ў кабінет кіраўніка.
Калегі кажуць, што часам не маглі звярнуцца да яго па параду ў чымсьці, бо яна заўсёды была побач і заўсёды ўсё выслухоўвала.
Кардаш рэгулярна сустракаецца з кіраўніцтвам краіны на неафіцыйных сустрэчах, ездзіць за мяжу на міжнародныя канферэнцыі, мае зносіны з дыпламатамі ў якасці карэспандэнта агенцтва да самай смерці свайго патрона.
«Мне проста больш падабаецца роля шпіёнкі пад выглядам журналісткі. Гэта праўда. Я сапраўды вельмі добра ўмею здабываць інфармацыю», — сказала яна ў перахопленай тэлефоннай размове.
Нязменны кіраўнік інфармацыйнага агенцтва «Інтэрфакс-Украіна» Аляксандр Мартыненка памёр у 2024 годзе ва ўзросце 63 гадоў.
І надалей, як паказала расследаванне, сэкс стане галоўным козырам беларускай Мата Хары.
Цяпер чытаюць
«Лічу, што гэта мая місія». Беларускамоўны Павел з ДЦП выклікаў хвалю захаплення, зайздрасці і любові3
Каментары